गल्याङ नगरपालिकाको कोषमा सभासद मुक्ति पाठकद्वारा २१ हजार र विपिसीबाट ५० हजार रुपैयाँ सहयोग

७ बैशाख स्याङ्जा । स्याङ्जाको गल्याङ नगरपालिकाले स्थापना गरेको प्रकोप व्यवस्थापन राहत कोशमा ११ लाख रुपैयाँ संकलन भएको छ । नगरपालिकाको राहत कोशमा आइतबार सम्ममा ११ लाख तीन हजार, छ सय ७६ रुपैयाँ राहत रकम जम्मा भएको हो ।

आइतबार संविधानसभा सदस्य मुक्तिप्रसाद पाठकले २१ हजार रुपैयाँ राहत कोशका लागि नगरप्रमुख भुपराज अधिकारीलाई हस्तान्तरण गरे । गल्याङ नगरपालिका ७ स्थायी घर भएका पाठकले नगरपालिकाको राहत कोशमा रकम जम्मा गरेका हुन् । राहत रकम हस्तान्तरण गर्दै सभासद पाठकले पीडितहरुको सेवामा थोरै भएपनि सहयोग गरेको बताए ।

उनले कोरोना भाइरसको संक्रमणबाट बच्नका लागि साबधानी अपनाउने क्रममा धेरै जनता विपत्तीमा परेको भन्दै उनीहरुको उद्दारमा स्थानीय तह पनि चनाखो भएर लाग्नुपर्नेमा जोड दिए । यस्तै, बुटवल पावर कम्पनी विपीसी गल्याङ शाखाको तर्फबाट शाखा प्रमुख डोल खरेलले गल्याङ नगरपालिकाको प्रकोप व्यवस्थापन राहत कोशमा रु. ५० हजार सहयोग गरेका छन् ।

रकम ग्रहण गर्दै नगरप्रमुख भुपराज अधिकारीले विपन्न गरिबहरुका लागि सहयोग रकमको सही सदुपयोग गर्न प्रतिबद्व रहेको बताए । उनले प्राप्त सबै सहयोगहरुको उचित ढंगले परिचालन गरी वास्तविक गरिबलाई राहत दिन क्रियाशिल रहने बताए । नगरप्रमुख अधिकारीले कहिलेसम्म यो सन्त्रास रहन्छ भन्ने कुराको कुनै टुङ्गो नभएकाले साबधानी अपनाएर बस्नुको विकल्प नभएको बताए ।

सहयोग हस्तान्तरण बुटवल पावर कम्पनी आँधीखोला केन्द्र गल्याङ शाखाका प्रमुख डोल खरेलले बुटवल पावर कम्पनीको तर्फबाट केन्द्रीय तह देखि नै सहयोग गरिएको जानकारी दिए । उनले स्थानीय तहमा पनि थोरै भएपनि सहयोग गरेर एक्यबद्वता जनाउन खोजिएको बताए ।