खाद्यान्न पाएपछि मोक्तानले कांग्रेस युवा नेता शाहीलाई दिईन हृदयदेखि नै धन्यवाद

९ बैशाख, काठमाडौं । लकडाउनका कारण करिब एक महिनादेखि सबै काम बन्द छ । दैनिक मजदुरीको काम बन्द भएपछि कसरी परिवार पाल्ने भन्ने चिन्तामा मजदुरी गरेर साँझबिहान खानेहरुलाई थपिएको छ । कोरोना भाइरसको सङ्क्रमण फैलिन सक्ने भन्दै सरकारले गत चैत्र ११ गतेदेखि देशव्यापी रुपमा लकडाउन गरेपछि मजदुरी गरेर खाने अधिकांश मारमा परेका छन् ।

अंकल चाउचाउ नि दिनुस न…. यो आवाज हो अनुस्का मोक्तानको । नेपाली कांग्रेसका युवानेता भूपेन्द्रजंग शाहीले राहत बाड्दा ती अबोध बालिका मुक्तानले भनेकी थिइन् । राहत सामाग्री आमाले बुझेर घरभित्र राख्दै गर्दा मलिन अनुहार लगाउर्दै सानी बालिकाले भनिन, अंकल हामीलाई चामल त दिनुभयो, मलाई खानको लागि चाउचाउ पनि दिनु न ।

विश्वव्यापी रुपमा फैलिएको कोरोना भाईरस (कोभिड १९) को संक्रमण फैलिन नदिन नेपालमा लकडाउन जारी छ ।लकडाउनले कुनैपनि मजदुरले काम गर्न नपाएर दुई दिनदेखि भोकै रहेकी अनिता मोक्तानलाई युवानेता शाहीले राहतस्वरुप चामल, दाल, तेल, तरकारी, चिनी वितरण गरेका छन् । हेटौंडा घर भई काठमाडौंमा डेरा गरि बस्दै आएकी अनिता मोक्तानलाई खाद्यान्न सामाग्री हस्तान्तरण गर्दा उनकी सानी छोरी अनुस्काले छेउमै आएर यसरी चाउचाउ मागेकी हुन् ।

संचार माध्यममार्फत खाद्यान्नको अभावले मोक्तानको चुलोमा आगो नबलेको खवर पाएपछि कांग्रेस नेता शाहीले खाद्यान्न लिएर मुक्तानको डेरामै पुगि सहयोग हस्तान्तरण गरेका थिए । खाद्यान्न अभावमा भोकै रहेकी ती महिलाले राहत पाएपछि खुशी हुँदै युवा नेता शाहीलाई हृदयदेखि नै धन्यवाद दिएकी छन् ।

सो घट्नाले आफूलाई निकै भावुक बनाएको बताउँदै युवा नेता शाहीले नेपालबहस डटकमलाई भन्छन्, “ती सानी नानीको त्यो चाउचाउ मगाईले मलाई साह्रै भावुक बनायो अनि ‘मैले खाद्यान्न मात्र लिएर गएको थिए, फेरि केही व्यवस्था गरेर चाउचाउ र विस्कुट पनि दिए ।” लकडाउनले अप्ठ्यारोमा मोक्तानका परिवार जस्तै अन्य नागरिकका लागि सरकारले नै राहतको व्यवस्थित प्याकेज ल्याउन शाहीले आग्रह गरेका छन् ।

कालिकोट जस्तो बिकट जिल्लाबाट गत आम निर्वाचनमा नेपाली कांग्रेसको तर्फबाट संसदीय निर्वाचनको पराजित उम्मेदवार समेत रहेका युवा नेता शाहीले सरकारले जारी गरेको लकडाउनमा काठमाडौं उपत्यकामा रहेका कालिकोट तथा कर्णालीबासीसँगै दैनिक जीविका चलाउन कठिन भएका अन्य जिल्लाका बासिन्दालाई पनि आफ्नो व्यक्तिगत खर्चमा राहत वितरण गरिरहेका छन् ।

नेता शाहीले भक्तपुरदेखि थानकोटसम्म कोठाभाडामा बसेर खाद्यान्न अभाव झेलेका विभिन्न व्यक्तिहरुको कोठा कोठामा पुगेर सहयोग स्वरुप खाद्यान्न वितरण गरिरहेका छन् । उनले वितरण गरेको राहत प्याकेजमा चामल, दाल, तेल, नुन, चिनी रहेको छ ।

करिब एक महिनादेखि जारी लकडाउनले गरिब, विपन्न, ज्यालादारी गर्ने मजदुर र असङ्गठित क्षेत्रमा काम गर्नेहरु सबैभन्दा बढी प्रभावित छन् । लकडाउनले उनीहरुको कमाउने, खाने र बाँच्ने अवसर खोसिएको छ । समस्यामा परेकालाई आफुले सक्दो सहयोग गर्ने अभियान जारी नै राखेको नेता शाहीले नेपालबहसलाई बताएका छन ।