पूर्व माओवादीको ठहरः अध्यादेश हामी केन्द्रित

९ बैशाख, काठमाडौं । प्रधानमन्त्री केपी ओलीले हिजो जारी गराएको अध्यादेश आफू केन्द्रित रहेको ठहर पूर्व माओवादी पक्षले गरेको छ । आज बिहानैदेखि अध्यक्ष पुष्पकमल दाहाल निवास खुमलटारमा बसेको बैठकले यस्तो ठहर गर्दै तर अहिले यसबारे विवाद नचर्काउने रणनीति अपनाउने भएको छ । छलफलमा सहभागी नेता हरिबोल गजुरेलले आफू निकट कार्यकर्ताहरुलाई यस्तो जानकारी दिएका छन् ।

गजुरेल निकट स्रोतका अनुसार, प्रधानमन्त्री ओलीले पूर्व एमालेका शीर्ष नेताहरुलाई व्यवस्थापन गर्न नसक्दाको परिणाम हो पछिल्लो परिस्थिति । शीर्ष नेताहरु माधवकुमार नेपाल, झलनाथ खनाल र बामदेव गौतमले आफूलाई साथ नदिई प्रचण्डलाई बलियो बनाउन खोजेको बुझाई ओलीको देखियो भन्दै गजुरेलले यसै कोणबाट छलफल गरिएको र अब ओलीको कदम पूर्व माओवादीलाई पार्टीबाट निकाला गर्नेतिर केन्द्रित हुनसक्ने आंकलन भएको जानकारी दिएको पनि स्रोतको दावा छ ।

अध्यक्ष प्रचण्डले कोरोना संक्रमणमा सबैजना मिलेर लडौं भनी राख्नुभएको सद्भावलाई ओलीजीले आफूविरुद्ध षडयन्त्र गरेको अर्थमा बुझेकाले नै समस्या चुलिएको हाम्रो ठहर रह्यो – उनले भने । ओलीजी हतास भएर यस्तो अध्यादेश जारी गर्न हतारिनु भयो भन्दै बैठकमा नेताहरुले तत्काललाई यो विषयमा धेरै बहस नगर्ने तर कोरोना कहर सकिएपछि भने घनिभूत रुपमा सम्वाद गर्ने सहमति भएको छ । साथै छलफलमा ओलीले जारी गराएका अध्यादेश संसदबाट अनुमोदन नहुने विश्वास रहेको ठहर गरिएको छ ।

ओलीजी बाहेक कोही पनि उक्त अध्यादेशको पक्षमा नरहेकाले संसदले अनुमोदन गर्ने सम्भावना छैन –स्रोतले बतायो ।प्रधानमन्त्री ओली अब पूर्व माओवादीहरुलाई लखेटेर एक्लै खाउँला भन्ने ध्याउन्नमा रहेको हामीले बुझ्यौं बैठकमा धेरै नेताको यस्तो भनाई रहेको समेत स्रोतले उल्लेख गरेको छ ।