कोरोना फैलाएको भन्दै चीनविरुद्ध अमेरिकाको मुद्दा !

१० बैशाख एजेन्सी । चीनबाट फैलिएको कोरोनाले हजारौ नागरिकको ज्यान गएको भन्दै अमेरिकाले चीनविरुद्ध अदालतमा मुद्दा हालेको छ । अमेरिकाको मिसौरी राज्यका महान्यायाधिवक्ता एरिक स्मिटले अमेरिकाकै अदालतमा चीनविरुद्ध मुद्दा दायर गरेका हुन् ।

यसअघि अमेरिकी राष्ट्रपति डोनाल्ड ट्रम्पले चीनले कोरोना भाइरस फैलाएको पाए कडाभन्दा कडा कारबाही गर्ने चेतावानी दिदै आएका थिए । अब अमेरिकाको एक राज्यले मुद्दा नै हालेपछि ट्रम्पले झन यो विषय तन्काउन सजिलो भएको छ । मंगलबार दर्ता भएको मुद्दामा चीन सरकार, चिनियाँ कम्युनिष्ट पार्टी र अन्य चिनियाँ अधिकारी तथा संस्थाहरुलाई विपक्षी बनाइएको छ ।

कोरोना भाइरसले सबैभन्दा ठूलो क्षति व्यहोरेको अमेरिकाले विश्वकै सर्वशक्तिमान बरियता पनि गुमाउने डर छ । विश्वकै नम्बर एक देश र शक्तिशाली भनिएको अमेरिकालाई कोरोनाले पुर्याएको क्षति पूर्ति गर्न धेरै बर्ष लाग्ने देखिन्छ । त्यो भन्दा ठूलो कुरा यसलाई नियन्त्रण गर्न असफल देखिएको अमेरिका चीनसँग नझुक्ने तर नयाँ निहुँ बनाएर उसमाथि क्रुद्ध बनेको पनि प्रमाण हो यो ।

चीनले जानीजानी कोरोना भाइरस फैलाएको भन्दै यसलाई उसैले मात्र नियन्त्रण गर्न सक्ने अमेरिकी दाबी छ । अब मुद्दा नै दर्ता भएपछि चीन त्यसविरुद्ध कसरी अगाडी बढ्छ भन्ने चाँसो बढेको छ ।

अदालतमा मुद्दा दर्ता हुञ्जेलसम्म अमेरिकामा कोरोनाका कारण ४५ हजार भन्दा धेरैको ज्यान गएको छ भने सवा ८ लाख मानिस संक्रमित छन । वुहान राज्यबाट फैलिएको कोरोनाले चीनमा ४ हजार ६ सय जनाको मृत्यु भएको छ भने ८२ हजार बढी संक्रमित छन ।

विश्वमा अहिलेसम्म कोरोनाबाट सवा २५ लाख मानिस संक्रमित छन । संक्रमितमध्ये ७ लाख मानिस उपचारपछि घर फर्किएका छन भने १ लाख ७२ हजारले ज्यानै गुमाएका छन ।