एक थुनुवाको आरडीटी रिपोर्ट पोजेटिभ

धीरुभाइ

१० बैशाख सप्तरी । छिमेकीलाई कुटपिट आरोपमा सप्तरीको प्रहरी हिरासतमा रहेको एकजनाको ¥यापिड डाइग्नोष्टिक टेष्ट (आरडीटी) गर्दा पोजेटिभ रिपोर्ट आएको छ । जिल्लाको डाक्नेश्वरी नगरपालिका स्थित इलाका प्रहरी कार्यालयमा रहेका एक थुनुवाको आरडीटी रिपोर्ट पोजेटिभ आएको राजविराज स्थित गजेन्द्रनारायण सिंह अस्पतालले जनाएको छ ।

गत सोमबार कुटपिट आरोपमा पक्राउ परेका थुनुवालाई अस्पतालमा मंगलबार आरडीटी गर्दा रिपोर्ट पोजेटिभ आएको अस्पतालका मेडिकल सुपरिटेन्डेन्ट डा. चुमनलाल दासले जानकारी दिए । उनलाई तत्कालै अस्पतालको आइसोलेसनमा भर्ना गरिएको छ ।

डाक्नेश्वरी नगरपालिका ४ का ४८ वर्षीय पुरुषलाई छिमेकीसँगको विवादमा प्रहरीले पक्राउ गरेको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक तिलक भारतीले जानकारी दिए । उनको स्वाब संकलन गरी पीसीआर प्रविधिबाट जाँचकालागि धरान स्थित विपी कोइराला स्वास्थ्य विज्ञान प्रतिष्ठान पठाउने तयारी भइरहेको बताइएको छ ।

यता जिल्लाको तिलाठी कोइलाडी गाउँपालिका २० जना मजदुर काठमाडाैंबाट बुधबार बिहान बसमा आएकोले उनीहरुको अस्पतालमा आरडीटी सुरु गरिएको छ । जिल्लाको विभिन्न क्वारेन्टाइनमा चार महिला र १२३ पुरुष गरी १२७ जना रहेका छन । तीमध्ये एक महिला र नौ पुरुष बुधबार क्वारेन्टाइनमा भर्ना भएको छ ।

त्यस्तै क्वारेन्टाइनको अवधिसम्म बस्दा कोरोनाको कुनै किसिमको लक्षण नदेखिएपछि आजै १७ जना पुरुषलाई घर फिर्ता गरेको स्वास्थ्य कार्यालयका निमित प्रमुख दुनियालाल यादवले जानकारी दिए । मंगलबारसम्म तीन महिला र १३१ पुरुष गरी १३४ जना क्वारेन्टाइनमा भर्ना रहेको थियो ।