मन्त्रिपरिषद बैठक बस्दै, अध्यादेश फिर्ता लिन आनाकानी

१२ बैशाख, काठमाडौं । गत सोमबार जारी गराइएका दुई अध्यादेश बेमौसमी बाजा भन्दै सर्वत्र विरोध भएपछि प्रधानमन्त्री केपी ओली फिर्ता लिन तयार भनिएपनि अहिलेसम्म छैन । यसै प्रसंङमा अहिले प्रधानमन्त्री निवास बालुवाटारमा मन्त्रिपरिषद बैठक डाकिएको छ ।

हिजो बिहान पार्टीका कार्यकारी अध्यक्ष पुष्पकमल दाहाल प्रचण्ड र नेता माधवकुमार नेपालसँगको भेटमा प्रधानमन्त्री ओलीले त्यस्तो संकेत गरेका थिए । हिजै साँझसम्म अध्यादेश फिर्ता हुने अनुमान गरिएकोमा त्यसो भएन ।  अपरान्ह शीतल निवास पुगेर राष्ट्रपति विद्यादेवी भण्डारीलाई भेटेपछि प्रधानमन्त्रीको मनस्थिति फेरिएको स्रोतको दावी छ ।

त्यो जानकारी पाएपछि प्रचण्डलगायत नेताहरु नेपाल, झलनाथ खनाल र नारायणकाजी श्रेष्ठ पार्टी उपाध्यक्षसमेत रहेका सचिबालय सदस्य वामदेव गौतमको भैंसेपाटी निवासमा भेला भए । सहभागी नेताहरुको एउटै धारणा बन्यो कि त ओलीले अध्यादेश फिर्ता लिन प¥यो वा स्थायी कमिटीको सामना गर्न । यसैबीच ओली खेमाका भनिएका महासचिब विष्णु पौडेल पनि गौतम निवास पुगे । उनले पनि निर्णयमा सहमति जनाए ।

साथै, प्रधानमन्त्री ओलीले संवैधानिक अंगमा नियुक्ति नसकेसम्म अध्यादेश फिर्ता नलिने संकेत गरेको जानकारीसमेत गराएका थिए । राष्ट्रपति भण्डारीले समेत यस्तै सल्लाह दिएको उनले बताउँदै भने– संघीय समाजवादी नटुक्रिएपनि एकीकृत पार्टी नै विभाजन हुने विश्वास ओलीमा रहेको छ ।

पूर्व राजपाका असन्तुष्ट नेताहरुले सिंगो पार्टी फुटाउने वचन दिएकाले तत्काल अध्यादेश फिर्ता नगर्न उचित हुने मनस्थितिमा ओली रहेको उनले जानकारी दिए । तर सचिबालयका पाँचै जना सदस्यले त्यस्तो खेलमा लागेर नेकपा बद्नाम हुने भन्दै तत्काल अध्यादेश फिर्ता लिनुपर्ने धारणा राखेका थिए ।

यसबारे जानकारी पाएपछि प्रधानमन्त्री ओलीले आज मन्त्रिपरिषद बैठक डाकेको स्रोतको भनाई छ । आजको बैठकमा प्रधानमन्त्रीले विकसित पछिल्लो घटनाक्रमबारे मन्त्रीहरुलाई जानकारी दिंदै केही समय पछि मात्रै विधेयक फिर्ता लिंदा राजनीतिक लाभ हुने धारणा राख्ने बुझिएको छ । त्यसैले आजको क्याबिनेट बैठकले अध्यादेश तत्कालै जारी नगर्न पनि सक्छ– स्रोतको भनाई छ ।