बेलायतमा कोरोना भाइरस विरुद्धको खोप परीक्षण सुरु

१२ बैशाख एजेन्सी । बेलायतमा पहिलोपटक कोरोना भाइरस विरुद्धको खोप मानिसमा परीक्षण सुरु भएको छ । खोप परीक्षणका लागि स्वतन्त्र रुपमा तयार भएका २ जना व्यक्तिमा परीक्षण थालिएको हो । अन्तराष्ट्रिय सञ्चार माध्यमहरुका अनुसार खोपको परीक्षणका लागि ८०० भन्दा बढी व्यक्तिले आफ्नो नाम लेखाइसकेका छन् ।

त्यसमध्ये आधालाई कोरोना भाइरस विरुद्धको खोप दिने तयारी भइरहेको समाचारहरुमा जनाइएको छ । र, बाँकी आधालाई मेनेनजाइटिसविरुद्धको खोप दिइनेछ । यसले कोरोना भाइरसलाई निको पार्न सक्ने अनुमान गरिएको छ । सम्भावित खोप परीक्षण अक्सफोर्डमा सुरु भएको छ ।

यसअघि अमेरिका, चीन, जर्मनी तथा फ्रान्समा पनि कोरोना भाइरसविरुद्धको खोप बनाउने प्रयासहरु भइरहेका छन् । तथापि, अहिलेसम्म निको हुने खोप विकास भइसकेको तथ्य बाहिर आएको छैन ।