प्रधानमन्त्री ओलीको ध्यान पुनः कोरोनातिर केन्द्रित !

१२ बैशाख काठमाडौं । अध्यादेश फिर्ता लिएपछि प्रधानमन्त्री केपी शर्मा ओलीको ध्यान पुनः कोरोनातिर केन्द्रित भएको छ । शुक्रबार दिउँसो मन्त्रिपरिषद बैठकबाट दुबै अध्यादेश फिर्ता लिएको घोषणा गरेका प्रधानमन्त्री ओलीले काठमाडौं कोरोनामुक्त भएको बताए ।

सामाजिक सञ्जाल ट्वीटरमा प्रधानमन्त्री ओलीले लेखेका छन, ‘कोरोना संक्रमित सबैभन्दा पाको उमेरकी ८१ वर्षीया जेष्ठ नागरिक सन्चो भएसँगै काठमाडौं उपत्यका हाललाई कोरोना बिरामी मुक्त भएकोमा सन्तोष लागेको छ ।’ बिहीबार सनसिटी अपार्टमेन्टका आमा छोरासँगै केलालीकी ५० बर्षीया महिला पनि डिस्चार्ज भएकी थिइन ।

काठमाडौंमा अहिलेसम्म ४ जनामा संक्रमण देखिएको थियो । सबै जना निको भएर घर फर्किसकेका छन । अहिलेसम्म ४८ जनामा संक्रमण पुष्टि हुँदा १० जनालाई सञ्चो भइसकेको छ ।