लकडाउन बैशाख २२ गतेसम्म लम्बिने संकेत

१३ वैशाख, काठमाडौं । बिगत एक महिनादेखि जारी लकडाउन थप एक साताका लागि लम्बिने भएको छ । उच्चस्तरीय समन्वय समितिको आज बसेको वैठकले हवाई उडान आगामी जेठ २ गतेसम्म लम्बाउने सिफारिस गरेपनि लकडाउन बारे मन्त्रिपरिषदलाई नै जिम्मा दिने निर्णय गरेको थियो ।

तर पछि उच्चस्तरीय कार्यदलले लकडाउन एक साता थप गर्नुपर्ने राय दिएको छ । यद्यपि यसबारे भोलि बस्ने मन्त्रिपरिषद वैठकले अन्तिम निर्णय लिनेछ । लकडाउन एक साता थपियो भने बैशाख २२ गतेसम्म जनता घरघरमै बस्नु पर्नेछ ।

कोरोना भाइरस सम्बन्धी उच्चस्तरीय समन्वय समितिको आजको वैठकले लकडाउन प्रभावकारी भएकै कारण कोरोना संक्रमणको नियन्त्रण प्रयास सही ट्र्याकमा रहेको निष्कर्ष निकालेको थियो । यसअघि काठमाडौं लगायतका कम प्रभावित जिल्लाहरुमा लकडाउन आंशिक खुकुलो बनाउने लगायतका विषयमा छलफल भएको थियो ।

काठमाडौं लगायतका कम प्रभावित क्षेत्रहरुमा सरकारी कार्यालय, बैंक तथा वित्तीय संस्था, उद्योग तथा निमार्ण क्षेत्र खुला गर्ने तथा निजी सवारी साधाहरु चल्न दिने बारे बहस भएपनि समितिले निर्णय लिन सकेन् । यसबारे पनि भोलि बस्ने मन्त्रिपरिषदको वैठकले निर्णय लिने जनाइएको छ ।

यसैबारे थप छलफल गर्न उच्चस्तरीय समन्वय समितिका संयोजक उपप्रधान तथा रक्षामन्त्री ईश्वर पोखरेलसहितका मन्त्रीहरु अहिले बालुवाटार पुगेका छन् । उनीहरुले प्रधानमन्त्री केपी शर्मा ओलीलाई कार्यदलको राय र बैठकमा आएका विकल्पहरुबारे ब्रिफिङ गर्ने बताइएको छ ।