विश्वभर कोरोनाबाट ज्यान गुमाउनेको संख्या २ लाख !

१३ बैशाख एजेन्सी । विश्वव्यापी महामारी कोरोना भाइरसबाट ज्यान गुमाउनेको संख्या २ लाख नजिक पुगेको छ । पछिल्लो तथ्यांकअनुसार यो समाचार तयार पार्दासम्म १ लाख ९९ हजार भन्दा धेरैको ज्यान गइसकेको छ ।

विश्वभर भाइरसबाट २८ लाख ६४ हजार ४ सय ३० जना संक्रमित भएकाे अन्तराष्ट्रिय समाचार एजेन्सीहरुले उल्लेख गरेका छन् । अहिलेसम्म सबैभन्दा धेरै अमेरिकामा ५२ हजार मानिसले ज्यान गुमाएका छन । यस्तै इटालीमा २५ हजार, स्पेन र फ्रान्समा समान २२ हजार, बेलायतमा २० हजार मानिसले ज्यान गुमाएका छन ।

यस्तै जर्मनी र इरानमा समान ५ हजार बढी, बेल्जियममा ६ हजार बढी, नेदरल्याण्ड्स र चीनमा ४ हजार बढी, ब्राजिलमा ३ हजार बढी मानिसको ज्यान गएको छ । यस्तै टर्की र क्यानडामा समान २ हजार बढी र स्वीट्जरल्याण्डमा १५ सय भन्दा बढी मानिसको ज्यान गएको छ ।

छिमेकी देश भारतमा २४ हजार बढी मानिस संक्रमित हुँदा ७ सय ८० जनाको मृत्यु भएको छ । नेपालमा अहिलेसम्म ४९ जनामा संक्रमण पुष्टि भएपनि कसैको ज्यान भने गइसकेको छैन ।