लकडाउन बैशाख मसान्तसम्म लम्बिने संभावना

१४ बैशाख, काठमाडौं । प्रधानमन्त्री केपी ओलीले आज दिउँसो २ बजेका लागि मन्त्रिपरिषद बैठक डाकेका छन् । देशमा जारी लकडाउन बढाउने सुझावसहित उच्चस्तरीय संयन्त्रले प्रतिवेदन दिएको आधारमा लकडाउनलाई निरन्तरता दिन लागिएको हो । स्रोतका अनुसार, संयन्त्रले एक सातालाई लकडाउन बढाउन सुझाएपनि प्रधानमन्त्री भने कम्तिमा दुई साता अर्थात बैशाख मसान्तसम्म लैजाने पक्षमा रहेका छन् ।

आज बस्ने मन्त्रिपरिषद बैठकले बैशाख ३१ गतेसम्मका लागि लकडाउन बढाउने संभावना छ– स्रोतले भन्यो । तर हिमाली क्षेत्र र कम जनघनन्व भएका क्षेत्रमा भने लकडाउन अलि खुकुलो बनाउने सन्दर्भमा प्रधानमन्त्री तयार भएको बुझिन्छ ।बैठकमा यसबारे विस्तृत छलफल गरिने भएको छ ।

तर काठमाडौं लगायत शहरी क्षेत्रमा भने तत्काल खुकुलो पार्न नसकिने ठहर प्रधानमन्त्रीको रहेको स्रोत बताउँछ । राजधानीलगायत संक्रमणको न्यून जोखिम रहेको स्थानमा लकडाउन खुकुलो बनाउन दवाव परेपनि प्रधानमन्त्री ओली राजनीतिक परिस्थिति अनुकुल नभएसम्म तयार नभएको बुझिन्छ ।

हाल पार्टीभित्र र बाहिर ओली धेरै बिरोधीको निशाना बनेका छन् । अध्यादेश प्रकरणबाट उब्जिएको राजनीतिक विवाद अझै टुंगिन सकेको छैन । जसले गर्दा ओली राजनीतिक दवावमा परेको अवस्था छ । त्यसैले पनि अहिले राजधानी लगायत शहरी क्षेत्रको जनजीवन खुकुलो हुँदा संभावित आक्रमणको सामना गर्न कठिन हुनसक्ने ठम्याई ओलीको रहेको छ ।