पूर्वआइजिपी खनालसहित दुई सांसदविरूद्ध अपहरण प्रकरणमा जाहेरी लिन प्रहरी नमानेपछि

१४ बैशाख काठमाडौं ।  नेकपाका सांसद महेश बस्नेत, किसान श्रेष्ठ र पूर्वआइजीपी सर्वेन्द्र खनालबिरुद्ध महोत्तरीका समाजवादी सांसद सुरेन्द्र यादवको अपहरण गरी काठमाडौँ ल्याएको जाहेरी दिन प्रहरीले अस्वीकार गरेको छ ।

पूर्वप्रधानमन्त्री तथा समाजवादी नेता बाबुराम भट्टराई, उपेन्द्र यादव, राजेन्द्र महतो, शरत्‌सिंह भण्डारी, अशोक राईलगायत नेताहरु आफ्नो पार्टीका सांसद डा। सुरेन्द्र यादवको बस्नेत, खनाल र श्रेष्ठलगायतले अपहरण गरी ल्याएको भन्दै जाहेरी दिन आइतबार दिउँसो प्रहरी परिसर काठमाडौं पुगेका थिए ।

तर, मुद्दा फाँटका डीएसपी कृष्ण चन्दले घटना महोत्तरीमा भएकाले उतै जाहेरी दिनुपर्ने भन्दै जाहेरी लिन मानिरहेका छैनन्। काठमाडौँ प्रहरी प्रमुखका रुपमा आइतबार नै पदबहाली गरेका एसएसपी श्याम ज्ञवाली भने अहिले मेट्रो प्रहरी पुगेका छन्।

नेताहरुले भने लकडाउनका बेला महोत्तरी गएर जाहेरी दिन असम्भव हुने भन्दै जाहेरी लिन आग्रह गरिरहेको बुझिएको छ।