ओली र नेपाल पक्ष सहमतिको नजिक, प्रचण्ड र झलनाथ सशंकित

१५ बैशाख, काठमाडौं । सत्तासिन नेकपाभित्रको बढ्दो अन्तर्विरोध अन्त्य गर्न पूर्वएमाले नेताहरु घनिभूत छलफलमा जुटेका छन् । पार्टी अध्यक्षसमेत रहेका प्रधानमन्त्री केपी ओली र नेता माधवकुमार नेपालबीच आज बिहान एक्लाएक्लै कुरा भएपछि समूहमा वार्ता शुरु भएको छ ।

नेता नेपालको निवास कोटेश्वरमा दुबै पक्षका नेताहरु निर्णायक छलफल भनिएपनि त्यसले कुनै निश्कर्ष निकाल्न सकेन् । बरु भोलि सचिवालय र पर्सी स्थायी कमिटि वैठक डाक्न माधव समुहले अडान राखेको छ । ओलीका तर्फबाट नेताहरु ईश्वर पोखरेल, महासचिव विष्णु पौडेल , प्रदेश ५ का मुख्यमन्त्री शंकर पोखरेल र परराष्ट्रमन्त्री प्रदीप ज्ञवाली सहभागी छन् भने नेपालका तर्फबाट स्थायी कमिटी सदस्यहरु भीम रावल, सुरेन्द्र पाण्डे र रघुजी पन्त रहेका छन् ।

ओली र नेपालबीच शक्ति बाडँफाटमा कुरा मिल्ने संकेत देखिएपछि त्यसलाई मूर्त रुप दिन दुबै पक्षले कार्यदल नै बनाएर छलफल गरिरहेको छन् । यसका लागि आजै प्याकेजमा सहमति हुनसक्ने भनिएपनि खासै निश्कर्ष निस्किएन् । स्रोतका अनुसार, प्याकेज सहमति हुँदा ओलीले अध्यक्ष पद हस्तान्तरण, मन्त्रिपरिषदमा पुनर्गठन,केही मुख्यमन्त्रीको हेरफेर लगायत रहेको छ ।

कार्यदलमा वरिष्ठ नेता झलनाथ खनाल निकट कोही नपरेपछि उनी झस्किएका छन् । यस्तै यो प्रकृयाबाट पूर्व माओवादी पक्षलाई समेत बेवास्ता गरिएको छ । ओली र नेपाल सत्ता बाँडफाँटमा सक्रिय भएपछि पूर्व माओवादी पक्ष धेरै नै सशंकित बनेको छ ।

अध्यक्ष पुष्पकमल दाहाल निकट स्रोत भन्छ– पूर्व माओवादीलाई कर्नर गर्ने गरी कुनै निर्णय गरियो भने हामीलाई अमान्य हुने छ । ओली र नेपाल पक्षको स्क्रियता बढेपछि वरिष्ठ नेता खनाल आज विहानै प्रचण्ड निवास पुगेका थिए । दुबै नेताबीच स्थायी कमिटी बैठक छलेर गरिने कुनै पनि सहमति अमान्य हुने सहमति भएको छ ।