भीरकोट नगरपालिकाका जनप्रतिनिधि अधिकारी जनताको घरघरमा

१९ बैशाख, स्याङ्जा । यतिबेला कोराना भाईरस (कोभिड १९ ) को सन्त्रासले संसारभरका नागरिकहरु आक्रान्तमा परेका छन । यस विषम परिस्थितिबाट गुज्रिरहेको अवस्थामा आम नागरिकको रक्षा र जीवनयापन गर्ने वातावरण तयार गर्नु सरकारको मूख्य कर्तव्य हो ।

धेरैको गाँसको समस्या समाधानका लागि जनताको घरघरमा जनप्रतिनिधि चुनावको बेला भोट माग्न आए जसरी नै आउन भन्ने चाहन्छन आमनागरिक, तर राहतसँगै जनताको सेवामा घर घरमा जनप्रतिनिधि जानु त परै नागरिकको समस्या बुझ्ने समयसम्म अधिकांश जनप्रतिनिधिहरुमा नभएको देखिन्छ ।

तर स्याङ्जाको भीरकोट नगरपालिकाले भने जनताको सेवालाई घर दैलोसम्म पुर्याउने काम गरेको पाइएको छ । भीरकोट नगरपालिका वडा न ५ का अध्यक्ष लक्ष्मण अधिकारी भने लकडाउन पछि पनि जनतालाई परेको समस्या बुझ्न र समाधानका लागि दिनरात नभनी लागि परेका छन । आफ्नो गाउँटोलमा जनताको सेवाका लागि उनी २४ घण्टै उपलब्ध रहन्छन् ।

लकडाउनको समस्याका कारण गाउँमा मलबिऊको समस्या रहेपछि मलको समस्या समाधान गर्न नगरपालिकाको पहलमा टोल टोलमा मल पुगाई किसानलाई राहत दिने, सामाजिक सुरक्षा भत्ता समेत नगरपालिकाको सहयोग र सम्बन्धित बैंकको सहकार्यमा घर घरमा लगेर वितरण, पहिलो चरणको राहत वितरणमा ८२४ जना अति विपन्न र ज्यालादारी गरी गुजारो टार्दै आएकाहरुलाई राहत वितरण,टाढाबाट आउनेहरुलाई स्तरीय क्वारेन्टाइन र सेवासहित स्वास्थ्य चेकअपको राम्रो व्यवस्थापनमा सक्रिय देखिन्छ उनी ।

बिहान छिट्टो उठ्ने वडाध्यक्ष अधिकारी आफ्नो वडाको हरेक बस्ती बस्तिमा पुग्ने गर्दछ्न । म जनताको सेवक हुँ, जनताको दुखमा साथ दिन र सुखमा रमाउन जनप्रतिनिधि बनाउनु भो, अब त्यही गर्दैछु, वडाध्यक्ष अधिकारी भन्छन । साथै उनले जनतालाई नआत्तिन र समस्या परेमा तुरुन्त आफुलाई भन्न अनुरोध समेत गरेका छन् ।

भीरकोट नगरपालिका भित्रका वडाहरुमा दोस्रो चरणको राहत क्रमश ९ ओटै वडामा प्रत्येक वडाका टोल संयोजकमार्फत वितरण गर्ने गरी २ जना घर परिवार भएको घरमा १० केजी चामल २ केजी दाल, २ केजी नुन र १ लिटर तेल त्यसैगरी ३ जनाको परिवारदेखि ५ जनासम्मको परिवारलाई २० केजी चामल,२ केजी दाल,२ केजी नुन र १ लिटर तेल त्यसैगरी ६ जना परिवार भन्दा माथिलाई २५ केजी चामल, २ केजी दाल, २ किलो नुन र १ लिटर तेल राहत स्वरुप ९ वटा वडाका लकडाउनबाट परेका वास्तविक प्रभावित १४ सय घरपरिवारलाई वितरण गर्ने कार्य शूरु भएको नगर प्रमुख छायाँराम खनालले नेपालबहस डटकमलाई बताए ।