आयोगमा सर्वेन्द्र खनाल र बस्नेतले पनि दिए उजुरी

२२ बैशाख, काठमाडौं । सांसद अपहरण प्रकरण झन झन बल्झिदै गएको छ । सांसद सुरेन्द्र यादवले आफुलाई अपहरण गरेको भन्दै अर्का सांसद महेश बस्नेत, कृष्णकुमार श्रेष्ठ, पूर्वआईजिपी सर्वेन्द खनालविरुद्ध राष्ट्रिय मानवअधिकार आयोगमा उजुरी दिएका थिए ।

सो उजुरी दिएको एक हप्ता पनि नबित्दै यादवविरुद्ध सांसदद्धय र पूर्वआईजिपी खनालले पनि आयोगमा उजुरी दिएका छन । तीनै जनाले आफूहरुले सांसद यादवलाई अपहरण नगरेको दाबी गरेका छन । यादवले वैशाख १८ गते आयोगमा उजुरी दिएको चारदिनपछि बस्नेत र खनालले आयोगमा उजुरी दिएका छन । अब आयोगले यो मुद्दालाई राजनीतिक मुद्दा भन्दै पन्छाउने सम्भावना बढेको छ ।

प्रधानमन्त्री केपी शर्मा ओलीले मधेसवादी दल फुटाउन अध्यादेश ल्याएपछि यादवलाई अपहरण शैलीमा काठमाडौं ल्याइएको थियो । अध्यादेशको विरुद्धमा पार्टी भित्र र बाहिर चर्को आलोचना भएपछि ओलीले अध्यादेशको औचित्य पुष्टि गर्न यावदलाई काठमाडौं ल्याएर तत्कालिन राजपालाई फुटाउने खेल शुरु गरेका थिए ।

तर यादव फुटाउ खेलबाट बाहिर आएपछि सरकारको योजना असफल भएको थियो । सोही प्रकरणमा मुछिएका पूर्वआईजिपी खनाल, सांसद बस्नेत र श्रेष्ठको निकै आलोचना भइरहेको छ । यसअघि यादवले आफुलाई अपहरण गरेको भन्दै प्रहरी कार्यालयमा उजुरी दिन गएका थिए । तर प्रहरीले उजुरी लिन मानेन ।

त्यसपछि उनीहरु सरकारी वकिलको कार्यालय पनि पुगेका थिए । तर सरकारी वकिलको कार्यालयले पनि उजुरी लिन नमानेपछि यादव मानवअधिकार आयोगमा पुगेका हुन ।