गभर्नर अधिकारीद्वारा सम्पति विवरण सार्वजनिक : जताततै जग्गा जमिन, नगद पनि प्रशस्त

२३ बैशाख, काठमाडौं । नेपाल राष्ट्र बैंकका गभर्नर महाप्रसाद अधिकारीले आफ्नो सम्पति विवरण सार्वजनिक गरेका छन् । नेपाल राष्ट्र बैंकको वेबसाइटमा आज सार्वजनिक गरिएको सम्पति विवरणमा गभर्नरको सम्पति लोभलाग्दो देखिन्छ ।

चल र अचल सम्पतिको विवरण हेर्दा उनी अर्बपति भएको स्पष्ट हुन्छ ।  देशका विभिन्न स्थानमा जग्गा जमिन रहेको र नगद पनि प्रशस्त रहेको विवरणमा उल्लेख छ । उनको बैंक खातामा नेपाली र बिदेशी मुद्रा समेत निक्षेप रहेको छ । अधिकारीले सार्वजनिक गरेको सम्पति विवरण अनुसार, ललितपुरको सैंबुमा झण्डै २८ आना जग्गा रहेको छ ।

श्रीमती सरिता पोखरेलका नाममा ललितपुरकै छम्पीमा चार रोपनी १० आना र २ रोपनी १५ आनाको अलग अलग कित्तामा घडेरी रहेको छ । यस्तै सोही ठाउँमा दुई रोपनी ६ आनाको अर्काे कित्तासमेत रहेको सम्पति विवरण उनले सार्वजनिक गरेका छन् ।

साथै, विराटनगर, झापाको सुरुङ्गा र मकवानपुरको हेटौंडामा पनि उनको जग्गा जमिन रहेको खुलाइएको छ । तर पैतृक थलो खोटाङमा भने उनको सम्पति रहेको विवरणमा उल्लेख गरिएको छैन । नगदतर्फ माछापुच्छ्र्र्रे बैंकमा करिब दुई लाख रुपैयाँ रहेको र नबिल बैंकमा दुई हजार ३०० अमेरिकी डलर मौज्दात रहेको देखाइएको छ ।

साथै, नागरिक लगानी कोषमा १२ लाख भन्दा बढी रकम रहेको पनि गभर्नर अधिकारीले उल्लेख गरेका छन् । जिन्सीतर्फ उनले दुईवटा मोटरसाइकल र एउटा टोयोटा कार रहेको देखाएका छन् । अधिकारीले करिब ५९ लाख रुपैयाँ ऋण दिएका छन् भने नागरिक लगानी कोषबाट ८ लाख रुपैयाँ ऋण लिएका छन् ।  यसका अलावा विभिन्न कम्पनी र बैंकमा समेत उनको उल्लेख्य मात्रामा शेयर रहेको छ ।

शेयर लगानीमा पनि उनी अब्बल दर्जामा रहेका छन् । मध्य तमोर हाइड्रोपावर कम्पनीमा उनको ५० लाख रुपैयाँको शेयर रहेको छ । करिब १५ लाख रुपियाँ बराबरको इलेक्ट्रोनिक्स सामान रहेको पनि सम्पति विवरणमा उल्लेख गरिएको छ । सुनचाँदीतर्फ भने २७ तोला सुन र ५० तोला चाँदी रहेको गभर्नर अधिकारीले खुलाएका छन् । श्रीमतीको दाइजो र पैतृक सम्पति रहेको पनि उनले विवरणमा दावी गरेका छन् ।

हेर्नुस गभर्नर महाप्रसाद अधिकारीले आज सार्वजनिक गरेको सम्पति बिवरण :