कोरोनाबाट विश्वभर दुई लाख ६५ हजारभन्दा धेरैको मृत्यु

२४ बैशाख, काठमाडौं । विश्वभर फैलिएको कोरोना भाइरसका कारण १३ लाखभन्दा धेरै सङ्क्रमित उपचारपछि निको भएका छन् । विश्वभर फैलिएकाे भाइरसबाट ३८ लाख २२ हजार ९ सय ८९ जनामा कोरोना सङ्क्रमण पुष्टि भएकोमा १३ लाख दुई हजार ९ सय ९५ जना निको भएको वल्डोमिटरले जनाएको छ ।

यस्तै यो समाचार तयार पार्दासम्म २२ लाख ५४ हजारभन्दा धेरैको उपचार भइरहेको छ । जसमध्ये दुई प्रतिशत अर्थात् ४८ हजार दुई सय ११ जनाको अवस्था जटिल रहेको र बाँकी २२ लाखभन्दा धेरैको अवस्था सामान्य रहेको छ । अहिलेसम्म दुई लाख ६५ हजारभन्दा धेरैको ज्यान गएको छ ।

गएको २४ घण्टामा विश्वका विभिन्न देशमा गरी ६ हजार आठ सय ११ जनाको ज्यान गएको छ । सबैभन्दा धेरै संयुक्त राज्य अमेरिकामा दुई हजार पाँच सय २८ जनाको ज्यान गएसँगै ज्यान गुमाउनेको सङ्ख्या ७४ हजार सात सय ९९ पुगेको छ । अमेरिकामा मात्रै १२ लाख ६३ हजार ९२ जनामा कोरोना सङ्क्रमण पुष्टि भएकोमा दुई लाख १२ हजार ९ सय ८१ जना निको भएका छन् ।

बेलायतमा ज्यान गुमाउनेको सङ्ख्या ३० हजार नाघेको छ । त्यहाँ दुई लाख एक हजारभन्दा धेरैमा सङ्क्रमण पुष्टि भएको छ । यसैगरी इटालीमा साढे २९ हजारभन्दा धेरै, स्पेनमा साढे २५ हजारभन्दा धेरैको ज्यान गएको छ ।

भारतमा कोरोना सङ्क्रमितको सङ्ख्या बढिरहेको छ । गएको २४ घण्टामा तीन हजार पाँच सय ८७ नयाँ बिरामी थपिएसँगै ५२ हजार नौ सय ८७ जनामा कोरोना पुष्टि भएको र एक हजार सात सय ८५ जनाको ज्यान गएको वल्डोमिटरले जनाएको छ । तर भारतको स्वास्थ्य मन्त्रालयले भने अहिलेसम्म ४९ हजार तीन सय ९१ जनामा कोरोना पुष्टि भएको र एक हजार ६ सय ९४ जनाको ज्यान गएको बताएको छ ।

कोरोनाको उद्गम देश चीनमा गएको २४ घण्टामा कोरोनाका कारण कसैको पनि ज्यान नगएको तर दुई जनामा सङ्क्रमण पुष्टि भएको चीनले दाबी गरेको छ । चीनमा अहिलेसम्म ८२ हजार आठ सय ८३ जनामा कोरोना पुष्टि भएकोमा ७७ हजार नौ सय ११ जना निको भएका छन् । त्यहाँ चार हजार ६ सय ३३ जनाको ज्यान गएको छ ।