काठमाडौंमा लकडाउन छ र ? प्रधानमन्त्री ओली

३० बैशाख, काठमाडौं । आज बिहानको मन्त्रिपरिषद बैठकमा प्रधानमन्त्री केपी ओली अनौठो ढंगमा प्रस्तुत भए । बैठक औपचारिक रुपमा सुरु भएलगत्तै उनले गृहमन्त्री रामबहादुर थापा बादलतिर हेर्दै प्रश्न गरे– काठमाडौंमा पनि लकडाउन छ र ?

प्रधानमन्त्रीले यस्तो प्रश्न गरेपछि मन्त्रीहरु मुखामुख गरे । प्रधानमन्त्री भने बोल्दै थिए– यस्तो पाराले संक्रमण रोकिंदैन । राजधानीमा दुई तीन दिनयता अलि बढी नै छाडापन देखिएको छ । आर्थिक गतिविधि भन्दा महत्वपूर्ण मानव जीवन हो । यसका कुनैपनि जोखिम लिन सकिन्न ।

अस्ति आइतबारदेखि काठमाडौंलगायत मुख्य शहरी क्षेत्रको जनजीवन खुकुलो बनाउने रणनीति गृह मन्त्रालयले लिएको छ। साथै अर्थमन्त्रीले पनि स्वास्थ्यसम्बन्धी सुरक्षा अपनाएर गतिविधि खुकुलो गर्न माग गरेका थिए । तर लकडाउन खुकुलो पार्दा मानिसले सामाजिक दूरी र स्वास्थ्यप्रति हेलचेक्र्याईं गरेको भन्दै प्रधानमन्त्री ओली क्रुद्ध देखिएका छन् । यसबारे उपयुक्त सिफारिश गर्न उनले उपप्रधानमन्त्री ईश्वर पोखरेल नेतृत्वको उच्चस्तरीय संयन्त्रलाई निर्देशन दिएका छन् । संभवतः आजै साँझ उक्त संयन्त्रको बैठक बस्ने छ ।

मन्त्रिपरिषद बैठकमा प्रधानमन्त्री ओलीले लिपुलेक प्रकरणबारे अझै अनौठो प्रतिक्रिया दिए । स्रोतका अनुसार, बैठकमा प्रधानमन्त्री ओलीले लिपुलेकमा भारतले सडक बनाइरहेको कुरा आफूलाई जानकारी नरहेको बताए । मलाई त यसबारे कसैले केही भनेको थिएन, किन यस्तो भयो ? भन्दै उनले मन्त्रीहरुसँग उल्टो गुनासो गरे ।

यसअघि बैठकमा परराष्ट्रमन्त्री प्रदीपकुमार ज्ञवालीले लिपुलेक प्रकरणबारे विस्तृत चर्चा गरेका थिए । लगत्तै ओलीले यसबारे भारतीय पक्षसँग नेपाली राजदूत निलाम्बर आचार्यले अनौपचारिक कुरा गर्दा सकारात्मक प्रतिक्रिया नपाएको रिर्पाेटिङ भएको खुलासा गरे । साथै, यसबारे जथाभावी नबोल्न पनि मन्त्रीहरुलाई चेतावनी दिए । भारतसँग सम्वाद गरेर नै समस्याको हल खोज्ने हो भन्दै मन्त्रीहरु संयमित भएर प्रस्तुत हुन निर्देशन दिए ।