नरेन्द्र मोदी ज्युलाई धन्यवाद !

♦ सुरेशकुमार पाेखरेल,  अधिवक्ता/ समाजशास्त्री/ मानवशास्त्री

सर्वप्रथम पश्चिम नेपालको कालापानी,लिपुलेक र लिम्पियाधुरा अतिक्रमणगरी सडक सञ्जाल समेत बिस्तार गरेर कब्जा गर्नुभएकोमा तपाँईलाई पुन एकपटक मुरीमुरी धन्यवाद दिन चाहान्छु  ।

१) तपाईले सन् २०१५ मा नेपालमा नाकाबन्दी लगाउँदा नेपाल दुखेको,छटपटाएको थियो तर तपाईको उक्त कृत्यले म हर्षबिभोर भएको थिएँ  र तपाईको नाकाबन्दीको पक्षमा मत जाहेर गरेको पनि थिएँ । किनभने सो नाकाबन्दी क्षणिक हुनेछ र त्यसले नेपाल र नेपालीमा चेतना आउने मात्र नभई नेपालको भु राजनीतिक शक्ति सन्तुलनमा परिवर्तन ल्याउने कुरामा म बिश्वस्त थिएँ ।

२) पाँच बर्ष अगाडि, तपाईको नाकाबन्दीको कार्यले नेपाल ब्युँझिएको, जनतामा जागरण, नेतृत्वमा चेतना र भारतप्रतिको दृष्टिकोणमा बदलाव आउने वातावरण तयार भएको थियो । नेपाल दक्षिणतर्फ मात्र नभई उत्तरतर्फ उन्मुख हुने र भारततर्फको निर्भरता र अन्तरघुलनमा कमी आउने कुरामा म बिश्वस्त थिएँ । सोही नाकाबन्दीका कारण उत्तर छिमेकी राष्ट्र चीनसँग केही सन्धी-सम्झौता समेत हुनगएको, केरूङ लगायतका नाकाहरू ब्यबस्थित हुन थालेको कुराले म आशावादी समेत थिएँ ।

३) तपाईले नाकाबन्दी गरेर भारत नेपालको असल छिमेक होईन भनि भारततर्फको लम्पसार प्रवृत्ति र कथित रोटी-बेटी सम्बन्ध बिरूद्ध सन्देश दिनुभएको थियो । त्यसको चार बर्षपछि सीमा अतिक्रमण गरि हाल सडक सञ्जालसमेत बिस्तार गरेर नेपाल र नेपालीका लागि अर्को बहुआयामिक शुभकामना सन्देश छाड्नु भएको छ । जसले भारतसँगको जनस्तरदेखिको अन्तरसम्बन्ध र नेपालको सुरक्षा नीतिमा नयाँ परिभाषा ल्याउने मात्र होईन जनतामा नेताप्रति थप जागरण आउने छ भन्ने कुरामा म बिश्वस्त छु ।

४) सीमा अतिक्रमण गर्नुभएकोमा मैले ११ नोभेम्बर २०१९  मा तपाईलाई बधाई पनि दिएको थिएँ । आज फेरि सडक निर्माण र उदघाट्न गरेर अतिक्रमित भुभागलाई पचाएर तपाईले तेस्रोपटक नेपाल र नेपालीका लागि थप गुन लगाउनु भएको छ । नेपालको सीमा सुरक्षा नीतिमा भएको कमजोरी,लाचारीपन, शासकहरूको अकर्मण्यतालाई जनस्तरमै नङ्ग्याई दिनुभएको छ । तपाईको यो कार्यले वास्तवमा नेपाली सुरक्षाकर्मीहरू सीमा सुरक्षार्थ परिचालित हुने वीर योद्दा नभएर ब्यारेकभित्र रहने बस्ने अकर्मण्य नेताहरूका आदेशपालक हुन । नेपाली शासक नेपालमा शासन गर्न अयोग्य, जनताले बिकल्प खोज्नुपर्ने भारतका राजनीतिक कठपुतली हुन भनेर सन्देश दिनुभएको छ ।

५) तपाईले अतिक्रमण गर्नुभएको नेपालको अतिक्रमित भुभाग नछाड्न र पचाउन तपाईलाई पुन अनुरोध गर्न चाहान्छु । किनकि सो भुभाग नछाड्दा नै नेपाल र नेपालीलाई दिर्घकालिन फाईदा छ । तपाईले नेपाल र नेपालीलाई जुन चोट दिनुभएको छ त्यो चोट निको भयो र अतिक्रमित भुभाग फिर्ता भयो भने त्यसको ईतिहास मेटिनेछ । फस्वरूप नेपाल र नेपाली पुन कुम्भकर्ण सुताईमा सुत्न सक्नेछन । परिणाम स्वरूप उत्तर-दक्षिणतर्फका धेरै भुभागहरू पुन अतिक्रमणको चपेटामा पर्न सक्नेछन ।