संक्रमित बढेपछि बारामा निषेधाज्ञा जारी !

३० बैशाख, बारा । कोरोनाबाट बचाउन लकडाउन गरिएपनि संक्रमित थपिएसँगै जिल्ला प्रशासन कार्यालय बाराले निषेधाज्ञा जारी गरेको छ । मंगलबार बसेको क्राइसिस मेनेजमेन्ट सेन्टरको बैठकले कोरोना रोकथाम तथा नियन्त्रणका लागि निषेधाज्ञा जारी गर्ने निर्णय गरेको हो ।

वैशाख २५ गते जारी भएको निषेधाज्ञालाई थप प्रभावकारी बनाउने उद्धेश्यसहित निषेधाज्ञा जारी गरिएको बैठकपछि जारी विज्ञिप्तमा जनाइएको छ । पर्साको वीरगञ्जबाट कार्यालयको काम तथा अन्य प्रयोजनका लागि बारा आवतजावत हुने (अत्यावश्यक स्वास्थ्य सेवा, विद्युत, सञ्चार, खानेपानी, बैंक, खाद्यान्न, दूध, पानी, ग्यास, तेल, तरकारी, औषधि, एम्बुलेन्स) बाहेक अन्य सवारी साधनहरुलाई पूर्ण रुपमा बन्देज लगाउने निर्णय गरेको छ ।

संक्रमणको जोखिमलाई मध्यनजर राख्दै स्थानीय प्रशासनबाट जारी भएका सिकिस्त बिरामी प्रयोजन बाहेकका हस्तलिखित तथा ई–पास समेत भोलिदेखि खारेज गर्ने निर्णय गरेको छ ।

बैठकले सर्वसाधारणहरुलाई अत्यावश्यक काम बाहेक बाहिर ननिस्कन समेत आह्वान गरेको छ । मंगलबार मात्र बारा र पर्सा लगायत २ नम्बर प्रदेशका जिल्लाहरुमा २ पत्रकारसहित ४० जनामा कोरोना संक्रमण पुष्टि भएको छ ।