आज नेकपाको स्थायी समिति बैठक बस्दै

३१ बैशाख, काठमाडौं । लामो विवाद र छलफलपछि सत्तारुढ नेपाल कम्युनिस्ट पार्टी ‘नेकपा’को स्थायी कमिटीको बैठक आज बस्दै छ । बिहान ११ बजे बस्ने बैठकमा सरकारको नीति तथा कार्यक्रम र भारतले अतिक्रमण गरेको नेपाली भूमिबारे छलफल गर्ने एजेण्डा छ ।

यसअघि २५ गते बस्ने भनिएको स्थायी कमिटी बैठक प्रधानमन्त्री एवम् पार्टी अध्यक्ष केपी शर्मा ओली र उनी निकटका सदस्यहरुको दबाबका कारण बैठक रोकिएको थियो ।

त्यसयता कार्यकारी अध्यक्ष पुष्पकमल दाहाल ‘प्रचण्ड’ले पटक पटक भेटे पनि प्रधानमन्त्री एवं अर्का अध्यक्ष ओली बैठक राख्न सहमत थिएनन् । तर एकाएक बैठक तय भएको सूचनासहित स्थायी समिति सदस्यहरुलाई बैठकमा बोलाइएको छ ।बैठकमा सीमा विवाद, सरकारको नीति तथा कार्यक्रम र आगामी रणनीतिका विषयमा छलफल हुनेछ ।