सरकारको नीति तथा कार्यक्रमले इच्छाशक्ति र आत्मविश्वास गुमायो : कांग्रेस सभापति केसी

३ जेठ, नुवाकोट । नेपाली कांग्रेस नुवाकोटका सभापति जगदीश्वर नरसिंह केसीले सरकारले ल्याएको नीति तथा कार्यक्रमले इच्छाशक्ति र आत्मविश्वास गुमाएको बताएका छन् ।

सामाजिक सञ्जाल फेसबुकमा सभापति केसीले स्टाटस लेख्दै नीति तथा कार्यक्रमले इच्छाशक्ति र आत्मविश्वास गुमाउनुका साथै पुरानै आश्वासनहरूको हेरफेर संस्करण रहेको बताएका हुन् । उनी अगाडि भन्छन्, विश्वभर महामारीको रुप लिएको कोरोना भाइरस महामारीको यो संकट समाप्ति र लकडाउन हटाएको भोलिपल्टदेखि के गर्ने भन्ने सवालमा सरकारको ठोस बचनबद्धता नभएको नीति र कार्यक्रम रित्तो रहेको उनले उल्लेख गरेका छन् ।

शान्ति सुरक्षा तोड्नेलाई कानुनको दायरामा ल्याई कारवाही गरिने नीति र कार्यक्रममा भनिएको प्रति व्यंग्य जनप्रतिक्रिया उल्लेख गदै  “त्यसरी शान्ति सुरक्षा तोड्नेलाई पक्राउ गर्न कुन प्रहरी खटाउने हो ? उसको नाम पनि नीति र कार्यक्रममा लेखेको भए यसले पूर्णता पाउने थियो ।” गत सालको नीति र कार्यक्रम ‘सबै काम गर्ने’ प्रतिबद्धता थियाे तर सबै काम गर्छु भनेको केही पनि नगर्ने नियत लुकेकाे छ । रेल र पानीजहाज चलाउने प्रतिबद्धता आएको छ । कोरोनाले थला परेको अर्थतन्त्रमा खर्बौको बजेट कहाँबाट ल्याएर रेल पानीजहाज चलाउने हो सरकार ?

मौलिक हक सुनिश्चित गर्ने नाममा १६ वटा कानुनहरू तथा संविधान कार्यान्वयन र आर्थिक सामाजिक रूपान्तरणका कानुनी आधार तयार गर्ने नाममा ६१ वटा कानुन तर्जुमा भएको होईन र भन्ने प्रश्न गदै सभापति केसीले संविधानलाई कस्न गर्ने, मौलिक अधिकार कुण्ठित बनाउने र दमन तथा निरंकुशताको शैलीले शासन चलाउन उक्त कानुन नबनाइएकाे बताएका छन् । सरकारले ल्याएको नीति र कार्यक्रम औपचारिक लेठा सक्नेगरी ल्याएको हो ? भन्ने प्रश्न गदै मन्त्रालयहरुबाट जे जे आयो त्यसलाई मिलाउने काम पनि नगरेर जस्ताको त्यस्तै राखेको सभापति केसीले उल्लेख गरेका छन् ।

राष्ट्रपति विद्यादेवी भण्डारीले गत वर्ष ‘मेरो सरकार’ भनेर चर्को आलोचना खेपेपछि यस वर्ष ‘यो सरकार, वर्तमान सरकार’ भनेर सम्बोधन गरेकी छिन् । गत वर्ष सरकारको नीति तथा कार्यक्रम प्रस्तुत गर्दा राजतन्त्रमा राजाले ‘मेरो सरकार’ भनेर सम्बोधन गरेजसरी राष्ट्रपतिले ‘मेरो सरकार’ भनेपछि प्रमुख प्रतिपक्षी दल कांग्रेसले चर्को आलोचना गरेको थियो ।