लकडाउन कति बढ्ला ?

४ जेठ, काठमाडौं । नेपालमा जारी लकडाउनको पछिल्लो श्रृखला आज सकिंदैछ । अब भोलिबाट बन्दाबन्दी खुकुलो होला कि कसिकसाउ ? भन्ने जिज्ञाशा सर्वसाधरणमा कमै मात्र छ । त्यसै त केपी ओली लकडाउन लम्ब्याउन बुर्कुशी मार्ने, भएन हिजै मात्र एक जनाको ज्यानै कोरोनाबाटै गएको पुष्टी भएको छ । सबैले अनुमान गरेका छन्–लकडाउन अझै कडा रुपमा लम्बिनेछ ।

तर अबको चरण कतिको होला भन्ने जिज्ञाशा चाहिं रहेको छ । यसै प्रयोजनका लागि सिफारिश गर्न उच्चस्तरीय कोरोना संक्रमण संयन्त्रको बैठक सिंहदरबारमा जारी छ । संयन्त्रले गर्ने सिफारिशका आधारमा साँझ ५ बजे बस्ने मन्त्रिपरिषद बैठकले यसबारे निर्णय लिने बताइएको छ ।

स्रोतका अनुसार, हाल जेठ १५ सम्मका लागि लकडाउन जारी राख्न संयन्त्रले सुझाव दिने भएको छ । तर प्रधानमन्त्री केपी शर्मा ओली भने लकडाउनलाई कम्तिमा जेठ मशान्तसम्म लैजानुपर्ने पक्षमा छन् । लकडाउन गरेर कोरोना नियन्त्रण गर्ने ओलीको मनसाय भित्र सत्ता राजनीति जोडिएको कतिपयको बुझाई छ । किनभने अहिले ओली पार्टी भित्रको आन्तरिक विवादमा रक्षात्मक अवस्थामा धकेलिएका छन् ।

त्यसबाट पार पाउन उनी लकडाउनलाई बलियो हतियार बनाउन चाहन्छन्– नेकपाकै नेताहरुको यस्तो भनाई छ ।लकडाउन जति लम्ब्याएपनि सरकारले जनतालाई सुरक्षित बनाउने र श्रमिक मजदूरलाई राहत दिने कुनै कार्यक्रम तयार गरेको छैन । त्यसैले जनतामा भने लकडाउनप्रति निराशा र आक्रोश थपिएको अवस्था छ ।