सांसद अपहरण : महेश बस्नेत, सर्वेन्द्र खनालको मुद्दा तामेलीमा

४ जेठ, काठमाडौं । सांसद अपहरण आरोपमा सत्तारुढ नेकपाका सांसदद्वय महेश बस्नेत, किसान श्रेष्ठ र निवर्तमान आइजिपी सर्वेन्द्र खनालविरुद्धको मुद्दा तामेलीमा राखिएको छ । जिल्ला सरकारी वकिलको कार्यालय, काठमाडौंले प्रहरीले दिएको रिर्पोटका अधारमा यो मुद्दा तामेलीमा राख्ने निर्णय गरेको हो ।

जाहेरी दर्ता लगाइएको आरोप पुष्टि हुने आधार नभेटिएकाले मुद्दा तामेलीमा राख्ने निर्णय गरिएको काठमाडौंका सहन्यायाधिवक्ता नुमराज खनालले बताए । प्रमाण भेटिएको खण्डमा भने पुन छानबिन अगाडी बढाउन उनको भनाई छ ।

प्रहरीले यो मुद्दा अगाडी बढाउने पर्याप्त आधार नभेटिएको प्रतिवेदन दिएको थियो । यसअघि १४ वैशाखमा काठमाडौं प्रहरी परिसरमा टेकुमा गएका जनता समाजवादी पार्टीका नेता डा. सुरेन्द्र यादवको जाहेरी प्रहरीले लिन मानेको थिएन ।

तर, सरकारी वकिलको कार्यालय, काठमाडौंले उनको जाहेरी दर्ता गरेर अनुसन्धानका लागि प्रहरीलाई निर्देशन दिएको थियो । यसका लागि राष्ट्रिय मानवअधिकार आयोगले सरकारी वकिलको कार्यालय र प्रहरीलाई प्रत्यक्ष रुपमा दबाब दिएको थियो ।