लकडाउन जेठ २० गतेसम्म लम्बियो

४ जेठ, काठमाडों । कोरोना भाइरसको महामारीलाई रोकथाम तथा नियन्त्रण गर्न सरकारले लकडाउन जेठ २० गतेसम्म लम्ब्याउने निर्णय गरेको छ ।

मन्त्रिपरिषद्को आइतबार बसेको बैठकले लकडाउन लम्ब्याउने निर्णय गरेको हाे । यसअघि बसेको उच्चस्तरीय समन्वय समितिको बैठकले लकडाउन लम्ब्याउनुपर्ने निष्कर्ष निकालेको थियो । आज लकडाउनको ५५ औं दिन पुगेको छ । आइतबारै बसेको कोभिड-१९ नियन्त्रण तथा रोकथाम समितिले लकडाउन १५ दिन थप गर्न सरकारलाई सिफारिस गरेको थियो ।

आइतबार नै कोरोना संक्रमणका कारण देशमा दोस्रो व्यक्तिको मृत्यु भएको छ । सिन्धुपाल्चोककी २९ वर्षिय महिला र बाँकेका २५ वर्षीय पुरुषको कोभिडका कारण मृत्यु भएको स्वास्थ्य मन्त्रालयले पुष्टि गरेको छ । तर, कोरोना संक्रमण झन् बढिरहेको छ । आइतबारसम्म सङ्क्रमितको सङ्ख्या २९५ पुगेको छ । छिमेकी देश भारतले पनि आजै नै लकडाउन २ साताका लागि थप गरेको छ ।