एमसीसी संसद्को सम्पति हो, त्यसमा ठूलो विवाद गर्न पर्दैन : प्रधानमन्त्री ओली

९ जेठ, काठमाडौं । प्रधानमन्त्री केपी ओलीले अमेरिकन मिलेनियम च्यालेञ्ज ‘एमसीसी’ संसद्को सम्पतिका रुपमा रहेकाले त्यसमा ठूलो विवाद नगर्न आग्रह गरेका छन् ।

सरकारको नीति तथा कार्यक्रममाथि उठेका प्रश्नको जवाफ दिनेक्रममा आज संसद् बैठकमा उनले भने– मित्रराष्ट्र अमेरिकाले दिने सहयोग सम्वन्धी यो कार्यक्रम अघिल्लो सरकारले गरेको सम्झौता हो । सरकार भनेको अविछिन्न उत्तराधिकारवाला संस्था हो, हिजोको निरन्तरता हो । हामीले त्यसको स्वामित्व लिनै पर्छ ।

अन्यथा, नेपालप्रति हेरिने अन्तराष्ट्रिय दृष्टिकोण अलग हुनेछ । त्यसैले संसद्मा प्रवेश गरेको यो विषयलाई राम्ररी केलाएर विश्लेषण गरौं । यस्तै, भारतले अतिक्रमण गरेको भूमि फिर्ता गरिछाड्ने उद्घोष उनले गरे । हाम्रो भूमि जसरी भएपनि फिर्ता ल्याउँछौं, यसका लागि संविधानको अनुसूचिसमेत परिवर्तन गरिनेछ – प्रधानमन्त्री ओलीले भने ।

साथै, भारतीय पक्षले आफ्नो सरकार चीनको उक्साहटमा काम गरिरहेको छ भन्ने भ्रम फैलाएकोप्रति संकेत गर्दै उनले भने– नेपाली जनताले पत्याएको सरकार हो, कसैको बैशाखी टेक्नुपर्दैन, कसैले तुच्छ बचन नगरे हुन्छ ।