नयाँ नक्शा जारी गर्ने प्रस्ताव मेरो हो : गौतम

७ जेठ, काठमाडौं । सत्तारुढ नेपाल कम्युनिष्ट पार्टीका उपाध्यक्ष बामदेव गौतमले नेपालको नयाँ नक्शा जारी हुनुमा आफ्नो भूमिका महत्वपूर्ण रहेको दावी गरेका छन् ।

नेपालका अतिक्रमित भूमिलाई समेटेर देशको नक्शा जारी गर्नुपर्ने सन्दर्भमा मैले सुरुदेखि नै पार्टीमा सशक्त विचार र जोडदार माग राख्दै आएको सबैमा स्मरण गराउन चाहन्छु– आज बिहान उनले सामाजिक सञ्जालमार्फत यस्तो धारणा सार्वजनिक गरेका छन् ।

यसपटक पनि छुटेको भूमि समेटेर नक्शा जारी गनुपर्ने प्रस्ताव पार्टी बैठकमा मैले नै राखेको हुँ– उपाध्यक्ष गौतमले भनेका छन् ।उक्त नक्शा जारी गर्न सरकारले निर्णय गरेसँगै प्रधानमन्त्री केपी ओली र भूमिसुधार मन्त्री पद्मा अर्यालको प्रशंशा भएकोमा उपाध्यक्ष गौतमले घुमाउरो शैलीमा असन्तोष प्रकट गर्दै भनेका छन्– अनुयायीहरु व्यक्ति केन्द्रित हुन्छन् र निश्चित व्यक्तिका नामलाई देवत्वकरण गर्न व्यस्त हुने चलन छ ।

तर, यो निर्णय पार्टीको सामुहिक निर्णय प्रकृयाबाट भएको हो, सोही अनुरुप नेपाल सरकारले पनि अनुमोदन गरेको वास्तविकतालाई सबैले स्वीकार गर्नुपर्छ । उनले अगाडि लेखेका छन्– यो सरकार अनेकन काममा आलोचनायोग्य हुँदाहुँदै पनि यो काम भने स्वागतयोग्य छ ।

महाकाली सन्धिका विषयमा तत्कालिन नेकपा एमालेसँग गम्भिर असहमति जनाउँदै गौतमले पार्टी विभाजन गरी माले पुनर्गठन गरेका थिए ।  त्यतिखेर उनले भारतीय पक्षले सीमा अतिक्रमण गरेको र पार्टीले प्रतिकार नगरेको भन्दै असन्तुष्टी प्रकट गरेका थिए । यस पृष्ठभूमिमा नेता गौतमले सरकारले जारी गरेको नेपालको नयाँ नक्शामा आफ्नो जश लिने प्रयास गरेको देखिन्छ ।