हङकङ्‌मा प्रदर्शन, प्रहरीद्वारा अश्रुग्यास प्रहार

११ जेठ, एजेन्सी । चीनले सुरक्षा सम्बन्धी नयाँ कानून ल्याउने भने पछि त्यसको विरोधमा हङकङमा प्रर्दशन सुरु भएको छ । प्रहरीले आइतबार प्रदर्शनकारीमाथि अश्रुग्यास प्रहार गरेको हो ।

प्रजातन्त्र पक्षधरहरुले चीनले घोषणा गरेको सुरक्षा सम्बन्धी नयाँ कानूनले हङकङको अस्तित्व नै अन्त्य गर्न सक्ने भन्दै विरोध गरेका हुन् । सयौँ प्रदर्शनकारीहरु हङकङको सिटी सेन्टरमा जम्मा भएर प्रदर्शन गरेका हुन् । उनीहरुमाथि प्रहरीले अश्रुग्यास प्रहार गरेको हो ।

प्रजातन्त्र पक्षधरहरुले चीनले घोषणा गरेको नयाँ सुरक्षा कानून कार्यान्वयनमा आएमा अन्ततः हङकङको विलय हुन सक्ने बताएका छन् । यस्तै सो कानून हङकङको आधारभूत स्वतन्त्रता र कानूनी शासनको भावना विपरित रहेको प्रदर्शनकारीको भनाई छ ।

सन् १९९७ मा बेलायतले हङकङको सार्वभौमसत्ता चीनलाई सुम्पिएसँगै त्यहाँ उच्चस्तरको स्वायत्ततासहित एक देश दुई प्रणाली लागु छ । चीनको हिस्सा भएर पनि हङकङ अलग छ । पछिल्लो समय चीनले हङकङको स्वायत्ततालाई कुण्ठित गर्न प्रयास गरिरहेको अधिकारकर्मी तथा प्रजातन्त्र पक्षधरहरुको भनाई छ ।