सरकार ! त्रिशुलीमा बस खस्दा छानविन हुन्छ, नवराज हत्यामा छानविन हुँदैन ?

१३ जेठ, काठमाडौं । नेपाली कांग्रेसका सांसद मीनबहादुर विश्वकर्माले रुकुमपश्चिम हत्या प्रकरणको संसदीय छानविन समिति गठन गर्न माग गरेका छन्।

मंगलबार प्रतिनिधि सभाको बैठकमा बोल्दै विश्वकर्माले जेठ १० गते ६ जनाको हत्या भएको घटना इतिहासकै त्रासदीपुर्ण घटना भएको बताउँदै निश्पक्ष छानविन गर्न समिति गठन गर्न माग गरेका हुन् । कोरोना भाइरसले चार महिनामा चार जनाको मात्रै ज्यान गएको छ। त्यो नरसंहरबाट ६ जनाको ज्यान गएको छ।

‘तीन जनाको लास भेटिएको र तीन जना बेपत्ता छन्,’ उनले भने, ‘त्रिशुलीमा बस खस्दा छानविन हुन्छ। तर, नवराज विश्वकर्मा सुस्मा मल्लसँग प्रेममा पर्छन् । प्रहरीले एक वर्ष अघि उमेर नपुगेकोले एक महिनापछि विवाह गर्ने भन्ने हुन्छ । मलाई लिन आउ भनेका कारण नवराज रुकुमपश्चिम जान्छन् । उनकी आमाले हारगुहार गर्छिन् । वडाध्यक्ष आउँछन् । घेरा हालेर गढिमाइको मेलामा राँगा काटे झैं सांघातिक हमला गर्छन् । चार किलोमिटर खेदिन्छ र मारिन्छन् ।’

घटनालाई प्रहरी प्रशासनले राजनीतिक प्रभाव र दवावमा तोडमोड गरेको उनको आरोप छ। ‘हजारौं वर्षदेखि अछुत बनेर बसेको समुदायले लोकतन्त्र, गणतन्त्र ल्याउँदा ठूलो योगदान गरेको छ । तर, यही गणतन्त्रमा अवोध बालकले प्रेम गरेको नाममा बलि चढ्नुपर्यो । गृहमन्त्रीको जवाफ माग्न चाहान्छु,’ उनले भने, ‘जातिय भेदभाव र छुवाछातविरुद्ध कानून बनाएका छौं । छुवाछुत मुक्त राष्ट्र पटकपटक घोषणा गरिएको छ । तर आज जसलाई जनताले मतदान गरे, जसको सरकार छ। उसकै मानिसहरु हत्यामा संलग्न छन् ।

लोकतन्त्र हुँदै गणतन्त्र आइसक्दा पनि परिवर्तनको आभास हुन नसकेको भन्दै सांसद विश्वकर्माले घटनामा जिल्ला प्रहरी कार्यालय राजनीतिक प्रभावमा परेको हो कि भन्नेसमेत भान परेको बताएका छन् ।