झापामा निरन्तरको हावाहुरी र वर्षाले किसानको बालीनाली नष्ट

१३ जेठ, झापा । झापा जिल्लामा बिगत ३ दिन देखिको निरत्नरको हावाहुरीले स्थानीय जनजिवन अत्यन्तै अस्तब्यस्त बनेको छ । गएको आइतबार र सोमबार राति आएको हावा हुरीको बितण्डा नबिर्सिदै हिजाे साँझ आएको हावाहुरीसहितको मुसलधारे बर्षाले झापा जिल्लामा किसानले लगाएको हजारौं बिगाहाको बर्खे धान खेतमै कुहिने अवस्थामा पुगेको छ भने किसानका बारीमा लगाएको पाकेको मकैसमेत कुहिएर जाने अवस्थामा पुगेको स्थानीय किसानहरुको गुनासो छ ।

लगातारको अत्याधिक बर्षाले किसानले लगाएको तरकारी बारीमा पानीको मात्रा अत्यधिक जम्नाले तरकारीहरुसमेत पहेँलो भएर मर्ने अवस्थामा पुगेको दमकमा तरकारी खेती गर्दै आएका अगुवा कृषक दधिबल चापागाँई बताउँछन् । लकडाउनकोसमेत प्रवाह नगरी लाखौ रुपैयाँ खर्च गरेर आफ्ना जहान बच्चा पाल्न किसानले लगाएको खाद्यान्न तथा नगदे बालीमा प्रकृतिले पनि साथ नदिएपछि किसानहरुको टेक्ने लौरोसमेत भाँचिएको झै भएको छ ।

सरकारले आगामी बर्षको बजेटमा किसानका पक्षमा बिस्तृत कार्यक्रम ल्याउनुपर्ने भन्दै यसका लागि सम्पूर्ण झापाली किसानहरु एकताबद्ध भएर सरकारको ढोका ढकढक्याउन अब पछि नपर्ने कुरामा झापाली किसानहरुको एक मत रहँदैं आईरहेको चापागाँईको भनाइ छ । तथापी हावा हुरीले पुर्याएको क्षतिको यकिन बिबरण भने आउन बाँकी नै छ ।