वालिङका कृषकलाई १४ हजार माछा भुरा वितरण

प्रकाश डोटेल

१४ जेठ, स्याङ्जा । स्याङ्जाको वालिङ नगरपालिका क्षेत्रका माछापालक कृषकलाई अनुदानमा माछाका भुरा वितरण गरिएको छ । भेटेरीनरी अस्पताल तथा पशु बिज्ञकेन्द्र स्याङ्जाको सहयोगमा वालिङ नगरपालिका पशु सेवा शाखाको समन्वयमा वालिङ नगरपालिका क्षेत्रका ८ जना माछापालक कृषकलाई अनुदानमा १४ हजार कमन कार्प जातका माछाका भुरा वितरण गरिएको हो ।

पशु शाखाले नगरपालिका क्षेत्रका व्यवसायिक फर्महरुलाई मागका आधारमा अनुदानमा माछाका भुरा अनुदान दिएको वालिङ नगरपालिका पशु शाखा प्रमुख देवकुमारी श्रेष्ठले जानकारी दिईन् । नगरमा माछापालनलाई ब्यवसायिक रुपमा अगाडि बढाएका फर्महरुलाइे मागका आधारमा अनुदानमा माछाका भुरा उपलब्ध गराएका उनले बताईन् ।

लकडाउनका समयमा माछाका भुराहरु ल्याउन समस्या हुने भएकाले पशु शाखाको समन्वयमा माछाका भुरा ल्याएको नगरपालिकाले जनाएको छ । लकडाउनमा नगरपालिकाले मौसमी तथा बेमौसमी तरकारी खेति गर्ने कृषकलाई समेत बिउ उपलब्ध गराएको छ ।

नगरपालिका क्षेत्रमा रहेका तमु बोनिजम कृषि पशु तथा मत्स्यपालन फर्मलाई दुई हजार, अर्बान कृषि फर्मलाई दुई हजार, आँधीखोला शहर माछापालन उद्योगलाई पाँच हजार, घ्वाङखोला शिव पार्वती मन्दिर तथा पार्कलाई एक हजार, सम्भव कृषि फर्मलाई एक हजार, आँधीखोला एग्रोफर्मलाई दुई हजार र रोहित कृषि तथा पशुपालन फर्मलाई एक हजार गरी चौध हजार कमन कार्प जातका माछाका भुरा अनुदान वितरण गरेको हो ।