सिरियाको उत्तरपश्चिमी भूभागमा ६ जना अतिवादी मारिए

१४ जेठ, एजेन्सी । सिरियाको उत्तरपश्चिमी क्षेत्रमा बुधबार भएको विस्फोटमा परी छ जना अतिवादी मारिएका छन् । ती अतिवादीहरु सिरियाका नभएर बाहिरका भएको बताइएको छ । अतिवादीहरुका हतियार राख्ने स्थानमा सो विस्फोट भएको बताइएको छ ।

सो स्थानमा केही दिन यतादेखि रुसी युद्धक विमानहरु उड्ने गरेको थियो । तर बुधबारको विस्फोटमा उक्त विमानको हात छ या छैन भन्ने विषयमा भने केही बताइएको छैन । सिरियाको अवस्थाको बारेमा अध्ययन गरिरहेको बेलायत कार्यालय रहेको एक मानवअधिकारवादी संस्था सिरियन अब्जरभेटरी फर ह्युमन राइट्सले उक्त हमलामा रुसी विमानको हात थियो या थिएन भन्ने कुरा पत्ता नलागेको बताएको छ ।

ती अतिवादीहरु टर्किस् इस्लामिक पार्टीआबद्ध रहेको अधिकारीहरुले जनाएका छन् । सिरियाली अधिकारीहरुले त्यो हतियार भण्डारण गरिएको स्थानभित्रै भएको विस्फोटका कारणले उनीहरुको निधन भएको हो या अरु कसैको हात छ भन्ने बारेमा बुझ्न नसकिएको बताएका छन् ।

उक्त विस्फोटन भएको स्थल सिरियाको इद्लिब प्रान्तमा पर्दछ । इद्लिब प्रान्तमा गएको मार्च महिनामा युद्ध विराम भएको भनिएको छ । तर पनि त्यहाँ आक्रमणका घटना भने रोकिएको छैन । करिब ३० लाख नागरिकको बसोबास रहेको उक्त प्रान्तमा पछिल्लो समय कोरोना भाइरसको प्रकोपका कारण आक्रमणका घटनामा केही कमी आएको बताइएको थियो ।