रुकुम पश्चिम हत्या प्रकरण : थप ६ जना पक्राउ

१५ जेठ, रुकुम । रुकुम पश्चिमको चौरजहारी नगरपालिका– ८ सोती गाउँमा गत शनिबार भएको घटनामा संलग्न रहेको आरोपमा प्रहरीले थप ६ जनालाई पक्राउ गरेको छ ।

यो संगै सोती घटनाबारे अनुसन्धान गर्न पक्राउ पर्नेको संख्या १८ पुगेको रुकुम प्रहरीले जानकारी दिएको छ । पीडित पक्षले दिएको किटानी जाहेरीका आधारमा उनीहरूलाई पक्राउ गरिएको प्रहरीले जनाएको छ ।

पीडित पक्षले २० जनाको नाममा किटानी जाहेरी दिएका छन् । यसअघि १२ जनालाई प्रहरीले पक्राउ गरेको थियो । जाहेरीमा उल्लेख भएका थप दुई जनाको खोजी भइरहेको रुकुम पश्चिम प्रहरीले जनाएको छ ।

पक्राउ पर्नेमा चौरजहारी नगरपालिका ८ का ४२ वर्षीय इन्द्रबहादुर मल्ल, १९ वर्षीय दीपेन्द्र चन्द, ३५ वर्षीय तिलक चन्द, ४६ वर्षीय हर्कबहादुर मल्ल, ४५ वर्षीय लिपेन्द्र मल्ल र २० वर्षीय विनोद मल्ल रहेका छन्

चौरजहारी– ८ सोतीगाउँकी किशोरीलाई विवाह गर्न भनी आएका भनिएका जाजरकोट भेरी नगरपालिका– ४ रानागाउँका २१ वर्षीय नवराज विक र उनीसँगै १८ जनाको समूहमा आएकाहरूलाई गाउँलेले आक्रमण गर्दै लखेटेका थिए ।

आक्रमण भएपछि सबै भागेका थिए । आक्रमणपछि वेपत्ता भएका ६ जनामध्ये नवराज विक, भेरी नगरपालिका– ४ रानागाउँका गणेश बुढा, चौरजहारी– १ का टीकाराम सुनार र भेरी नगरपालिका– ११ जाजरकोटका लोकेन्द्र सुनारको भेरी नदीमा शव फेला परेको छ । दुईजना अझै बेपत्ता छन् ।

बेपत्ता भएका भेरी नगरपालिका– ४ का १८ वर्षीय सञ्जु विक र १७ वर्षीय गोविन्द शाहीको भेरी नदीमा खोजी भइरहेको प्रहरीले जनाएको छ । उनीहरूको नेपालन्जबाट आएको तालिमप्राप्त गोताखोरको टोली परिचालन भएको छ ।