लकडाउनलाई ‘शून्य अवधि’ घोषणा, खुलेको ३० दिनभित्र गए हुने

१५ जेठ, काठमाडौं । सर्वोच्च अदालतले कोराना महामारीको नियन्त्रणका लागि लागू गरिएको लकडाउन अवधिलाई ‘शून्य अवधि’ घोषणा गर्ने ऐतिहासिक फैसला सुनाएको छ।

सर्वोच्च अदालतले लकडाउनको अवधिलाई ‘शुन्य समय’को परिकल्पना गर्दै लकडाउन खुलेको ३० दिनभित्र मुद्दामामिलामा हदम्याद नलाग्ने निर्णय गरेको हाे ।

सर्वोच्च अदालतमा बहालवाला सबै १९ जना न्यायाधीश सम्मिलित बृहत्तर प्रकृतिको इजलासले अरु म्यादहरु पनि ३० दिन कायम हुने फैसला गरेको हो । फैसला अनुसार लकडाउन खुलेको एक महिनाको अवधिमा मुद्दाका पक्षहरुले हदम्याद नाघेको भए पनि मुद्दा दायर गर्न, तारिख लिन, पुनरावेदन गर्न पाउनेछन् ।

एकैसाथ १९ जना न्यायाधीशहरु बस्न इजलासको अभाव भएपछि भूकम्पको बेला सर्वोच्च अदालत परिसरमा स्थापित पालमा निर्मित हलमा नै इजलास बनाइएको थियो । मुद्दाको राय लेखेका न्यायाधीश ईश्वरप्रसाद खतिवडाले नै निर्णयको ठहरखण्ड पढेर सुनाएका थिए ।

लकडाउनका कारण अदालतहरु बन्द हुने भएपछि हदम्यादका कारण केही मुद्दाहरुमा जटिलता देखिएको थियो । यही विषयलाई सम्बोधन गर्नुपर्ने भनी सर्वोच्च अदालतको मुद्दा महाशाखाले टिप्पणी उठाएर सर्वोच्च अदालतमा पेश गरेको थियो । त्यसका साथै अधिवक्ता टिकाराम भट्टराई र महेश्वर श्रेष्ठले दर्ता गरेको निवेदनमाथि पनि बृहत पूर्ण इजलासले व्याख्या गरेको छ ।