बजेटबारे कांग्रेस नेता रिजालकाे टिप्पणी : नेकपा सरकारको असफलता !

१५ जेठ, काठमाडाैं । नेकपा सरकारले लगातार तेस्रो बर्ष ल्याएको बजेटलाई प्रमुख प्रतिपक्षी दल कांग्रेसले असफलताको दस्ताबेजको संज्ञा दिएको छ । आर्थिक वर्ष २०७७/७८ को बजेटलाई नेपाली कांग्रेसले सरकार र नेपाल कम्युनिष्ट पार्टी नेकपाको असफलताको दस्तावेज भएको प्रतिक्रया दिएको हो ।

‘बजेट सरकार र नेकपाको असफलताको रुपमा आएको छ’ नेपाली कांग्रेसका नेता मिनेन्द्र रिजालले भने, ‘झण्डै दुई तिहाइको बलशाली सरकारले यस्तो कठिनाइका बेला नयाँ भिजनसहितको बजेट ल्याउन सक्नु पर्द’थ्यो, कल्पनाशीलता प्रदर्शन गर्न सक्नुपर्द’थ्यो ।’

रिजालले सरकारले अप्ठ्यारोमा आँखा खोल्न नसकेको भन्दै सार्वजनिक खर्च पुनरावलोकन आयोगको प्रतिवेदन कार्यान्वयन गर्ने भनिए पनि ठोस रुपमा अङ्कमा नआएको बताए । ‘राजस्वको अनुमान संशोधितभन्दा २२ प्रतिशतले बढाउने भनिएकाे छ, जुन यथार्थपरक छैन’ उनले टिप्पणी गरे ।