क्वारेन्टाइनमा रहेका व्यक्ति र प्रहरी बीच झडप, अवस्था असामान्य भएपछि १३ राउण्ड हवाइफायर

१६ जेठ, काठमाडौं । रौतहटमा कोरोना संक्रमितलाई आइसोलेसनमा लैजान पुगेको प्रहरी र स्वास्थ्यकर्मीमाथि क्वारेन्टाइनमा बसेकाहरूले आक्रमण गरेपछि तनाव उत्पन्न भएको छ । प्रहरीस्रोतका अनुसार दुईजना कोरोना संक्रमितलाई अस्पताल लैजान खोज्दा क्वारेन्टाइनमा रहेकाहरूले अवरोध गरेपछि तनाव उत्पन्न भएको हो ।

स्थिति नियन्त्रण बाहिर जान खोजेपछि प्रहरीले अवस्थालाई सामान्य बनाउने १३ राउन्ड हवाई फायर गरिएको प्रदेश २ का प्रहरी प्रमुख डीआईजी धीरजप्रताप सिंहले जानकारी दिएका छन् । उनका अनुसार रौतहटको इशनाथ गाउँपालिका जोकाहास्थित अनवारुल इस्लामिक मदरसाको क्वारेन्टाइनमा राखिएका दुई व्यक्तिमा आज बिहान कोरोना संक्रमण पुष्टि भएको थियो । उत्तः क्वारेन्टाइनमा भारतबाट फर्किएका २ सय जनालाई राखिएको छ ।