भारतीय मिडियामा आएको समाचारप्रति सेनाको गम्भीर ध्यानाकर्षण

१६ जेठ, काठमाडौं । केही भारतीय मिडियामा आएका समाचारप्रति नेपाली सेनाले आफ्नो गम्भीर ध्यानाकर्षण भएको जनाएको छ।

हिन्दुस्तान टाइम्सले जेठ १४ गते ‘इन ह्युज सेटब्याक टु पीएम ओली, नेपाल्स न्यू पोलिटिकल म्याप हिट्स अ रोडब्लक’ शीर्षक तथा टीएफआइ पोष्टले जेठ १५ गते ‘ओली अर्डर नेपाल चिफ अफ आर्मी टु रिबुट इन्डियन आर्मी चिफ्स रिमार्कः, द नेपलिज जेनरल सेड नो थ्याङ्क्स’ शीर्षकमा समाचार प्रकाशन गरेका थिए। यस्ता समाचार दुई देशका सेनाबीचको ऐतिहासिक सम्बन्ध र विश्वासमा नकारात्मक असर पुर्याउने उद्धेश्यबाट प्रेरित भएको सेनाले उल्लेख गरेको छ।

दुवै समाचार हालै लिपुलेक विवादको सन्दर्भमा भारतीय स्थल सेनाध्यक्ष एमएम नरवणेले नेपालबारे दिएको आपत्तिजनक अभिव्यक्तिसँग सम्बन्धित देखिन्छन् । बिहीबार राति विज्ञप्ति निकालेर नेपाली सेनाले यी समाचारप्रति ध्यानाकर्षण भएको र यी समाचार भ्रामक दुरासयपूर्ण काल्पनिक र निराधार रहेको स्पष्ट पारेको छ।

आगामी दिनहरुमा समेत विभिन्न माध्यमबाट नेपाल, नेपाली नागरिक र नेपाली सेनासम्बन्धी यसप्रकारका अफवाह फैलाउने प्रयास हुने भएकाले सचेत र सजक हुन सेनाले अनुरोध गरेको छ ।