रुकुम घटनामा राजनीतिकरण नगरी निष्पक्ष छानवीन र कारवाही गर्न महासचिव विष्टको माग

१६ जेठ, काठमाडौं । नेपाल पत्रकार महासंघका महासविच रमेश विष्टले जातीय भेदभाव तथा छुवाछूत विरुद्धको रुकुम घटनाको राजनीतिकरण नगरी निष्पक्ष छानवीन र कारवाही गर्न माग गरेका छन् । काठमाडौंको माइतिघर मण्डलामा आयोजित धर्ना कार्यक्रममा बाेल्दै महासचिव विष्टले दलितमाथिको उत्पीडन र भेदभाव तत्काल अन्त्य गर्न सरकारले शुन्यसहनशीलता अपनाएर कानुन कार्यान्वयन गर्नुपर्ने बताएका हुन।

रुकुम पश्चित चौरजहारी नगरपालिका— ८ सोतीमा भएको नसंसहारबाट ५ जना मारिएको घटनाको निष्पक्ष छानवीन र पीडित परिवारलाई न्याय तथा क्षतिपूर्तिको माग गर्दै राष्टिय दलित पत्रकार संघ नेपालले देशभर एकसाथ धर्ना कार्यक्रम सम्पन्न गरेको हो । काठमाडौंको माइतिघर मण्डलामा आयोजित धर्ना कार्यक्रममा पाँजजना दलित समुदायका युवाहरु सेतो कपडाले बेरिएर क्याण्डिल बालेर धर्नामा बसेका थिए ।

घटनालाई तोडमोड गरेर पीडित परिवारलाई थप अन्याय गरिएकोप्रति सरकारको ध्यानाकर्षण गरिएको छ । कार्यक्रममा जागरण मिडिया सेन्टरका रेम बिश्वकर्मा, साझा पार्टीका नेता प्रकाशचन्दश् परियार, पत्रकार ऋषि धमला लगायतको उपस्थित रहेको थियो । लकडाउनका बेला दलित समुदायमाथि जातीय भेदभाव तथा छुवाछूतको घटनाहरु बढिरहेको तर सरकारले वेवास्ता गरेको भन्दै दबाव मूलक कार्यक्रमहरु गरेकाे बस्ती संरक्षण अभियान नेपालघले जनाएको छ ।

माइतिघर मण्डलामा सम्पन्न कार्यक्रममा दलित आन्दोलनका अगुवा, युवा तथा अधिकारकर्मीहरुको सहभागिता थियो । छुवाछूतका घटनाहरु विरुद्ध संघले निरन्तर विरोधका कार्यक्रमहरु गर्दै आइरहेको छ । गत १० गते साँझ चौरजहारी नगरपालिका ८ सोतीमा अन्तरजातीय विवाह गर्ने क्रममा भएको घटनामा ५ जना युवाहरुको ज्यान गएको छ भने एकजना अझै बेपत्ता छन ।  घटनामा जाजरकोटका नवराज विक, टिकाराम सुनार, गणेश बुढामगर, लोकेन्द्र सुनार, सञ्जु विकको मृत्यू भएको थियो । गोविन्द साही अझै वेपत्ता छन । घटनामा संलग्न चौरजहारी ८ का वडाध्यक्ष डम्बरबहादुर मल्लसहितलाई प्रहरीले नियन्त्रणमा लिएको बताइएको छ ।