एमसीसीबारे सचिवालय बैठकमा चर्काे विवाद

१७ जेठ, काठमाडौं । केपी ओली नेतृत्वको वर्तमान सरकार अमेरिकी मिलेनियम च्यालेञ्ज (एमसीसी) जसरी भएपनि संसदको चालु अधिवेशनबाट पारित गर्न उद्यत् भएपनि पार्टीभित्र फेरि नयाँ विवाद शुरु भएको छ ।

अर्थमन्त्री डा. युवराज खतिवडाले अस्ति संसदको संयुक्त बैठकमा पेश गरेको आगामी आर्थिक वर्षको बजेटमा एमसीसीका लागि बजेटको विशेष व्यवस्था घुसाइएपछि यो विवाद थप पेचिलो बन्न थालेको छ । पार्टीका कार्यकारी अध्यक्ष पुष्पकमल दाहाल ‘प्रचण्ड’ले यसबारे हिजो प्रधानमन्त्री ओलीसँग गम्भिर असहमति जनाएकाले आज बिहान सचिवालय बैठक बोलाइएको छ ।

प्रधानमन्त्री निवास बालुवाटारमा बिहान १० बजे डाकिएको बैठक जारी छ । आजको बैठकमा सचिवालय सदस्यका साथै स्थायी कमिटी सदस्य भीमबहादुर रावल, परराष्ट्रमन्त्री प्रदीपकुमार ज्ञवाली र अर्थमन्त्री डा. खतिवडासमेत सहभागी छन् ।

मूलतः यो विषय विवादित छ, त्यसैले चोर बाटोबाट घुसाउने काम गलत हो– नेता रावलले भनेका छन् । पार्टीबाट निर्णय नगरी सरकारले यो विषयलाई ल्याउने काम गलत हो भन्दै नेता रावलले आजको सचिवालय बैठकमा यसको औचित्यबारे प्रश्न गरिने बताए ।

गत जेठ २ गते राष्ट्रपति विद्यादेवी भण्डारीले संसदमा पेश गरेको नीति तथा कार्यक्रममा समेत यो विषय परेको थियो । त्यसको पनि चर्काे आलोचना भएको थियो । प्रधानमन्त्री ओलीले यसबारे निर्णय गर्ने अधिकार सांसदहरुको भएको टिप्पणी गरेका थिए ।

बजेटमा पनि वैदेशिक अनुदान शीर्षकमा यसलाई समेटिएको छ । यद्यपि एमसीसी भनेर उच्चारण भने गरिएको छैन ।