संक्रमण बढी फैलिएको स्थानमा सेना परिचालन गर्ने निर्णय

१७ जेठ, काठमाडौं । सरकारले लकडाउन लम्ब्याउने निर्णय गरेसँगै आवश्यक ठाउँमा सेना परिचालन गर्ने भएको छ ।शनिबार प्रधानमन्त्री निवास वालुवाटारमा बसेको सुरक्षा परिषद् बैठकले सेना परिचालन गर्ने सिफारिस अनुसार मन्त्रिपरिषदले निर्णय गरेको हो ।

यस्तै, सरकारले भारत तथा तेस्रो मुलुकमा रहेका २५ हजार नेपालीलाई ल्याउने निर्णय गरिसकेको छ भने भारतबाट आउनेका लागि २० वटा नाका तोकेको छ ।

यसपालिको लकडाउन जेठ २० गते मंगलबारसम्म थियो। त्यसपछि १२ दिन थपेर जेठ मसान्तसम्म लकडाउन जारी राख्ने निर्णय गरिएको एक मन्त्रीले जानकारी दिए। मन्त्रिपरिषदले हवाई उडान असार १६ गतेसम्म बन्द राख्ने निर्णय पनि गरेको छ। सीमा सिलबन्दी त्यति बेलासम्म जारी रहनेछ।

पछिल्लो समय कोरोना संक्रमित संख्या बढ्दै गएको छ। शनिबार एकै दिन १८९ जना संक्रमित थपिएका छन्। त्यस्तै, मृतक संख्या पनि ७ पुगेको छ। यही स्थिति हेरेर मन्त्रिपरिषद बैठक यस्तो निर्णयमा पुगेको हो।