कम्युनिटी, युनिटी र इम्युनिटीका लागि योगाभ्यास उपयोगी : नरेन्द्र मोदी

१८ जेठ, एजेन्सी । भारतका प्रधानमन्त्री नरेन्द्र मोदीले कम्युनिटी, युनिटी र इम्युनिटी ‘अर्थात् समुदाय, एकता र शारीरिक क्षमता’ का लागि योगाभ्यास अत्यन्त उपयोगी रहेको बताए । कोरोना भाइरसलाई पराजित गर्न पनि योगाभ्यासको आवश्यकता रहेकोमा उनले आइतबार जोड दिए ।

योगाभ्यासले शारीरको क्षमता बढाउने र क्षमता बढाएमा कोरोना भाइरसलाई जित्न सकिने भएकाले कोरोना भाइरस संकटका बेलामा योगाभ्यास अझ उपयोगी र आवश्यक रहेको उनको भनाई छ । मासिक रेडियो कार्यक्रम “मन की बात”मा बोल्ने क्रममा प्रधानमन्त्री मोदीले योगाभ्यास र आयुर्वेदलाई विश्वभरका नेताहरुले चासो राख्ने गरेको उल्लेख गरे।

“मैले विश्व नेताहरुसँग कुराकानी गर्नेक्रममा योगाभ्यास र आयुर्वेदले कोरोना भाइरस विरुद्धको उपचारका लागि सहयोग गर्न सक्ने बारेमा चासो राख्ने गरे,” उनले भने । अन्तराष्ट्रिय योग दिवसको पूर्वसन्ध्यामा प्रधानमन्त्री मोदीले योगको महत्व र उपयोगिताका बारेमा चर्चा गरे । हरेक वर्षको जुन २१ तारिखका दिन विश्वभरी अन्तराष्ट्रिय योग दिवस मनाउने गरिएको छ ।