घुस नपाएपछि जनप्रतिनिधि नै गुण्डागर्दीमा उत्रे

१९ जेठ, बीरगञ्ज । देश अढाई महिनादेखि लकडाउनमा छ । सर्वसाधारण जनजीवन चलाउनै नसक्ने गरी थला परेको अवस्था छ । उद्योगधन्दा ठप्प छन् । सीमित उद्योग ठूलो जोखिम मोलेर सञ्चालनमा छन् । तर तिनै उद्योग अहिले जनप्रतिनिधिको भेषमा रहेका केही गुण्डाहरुसँग प्रताडित भइरहेका छन् ।

लकडाउनका बेला एकजना कथित जनप्रतिनिधि भने राहतको नाममा पैसा उठाउने धन्दामा सक्रिय भएको खबर छ । यस्तै उदण्ड व्यवहार देखाउनेमा रहेका छन्– बारा जितपुर सिमरा वडा नं ५ का वडाध्यक्ष मोहित चौधरी । गएराति वडाध्यक्ष चौधरीले करिब दुई दर्जन गुण्डा दलबलसहित बकुलियास्थित एडभान्स सिमेण्ट फ्याक्ट्री अगाडि कच्चा पदार्थ क्लिंकर लिएर आएको ट्रक ड्राइभर र सहचालकसहित कर्मचारीमाथि हातपात गरेका छन् ।

वडाध्यक्ष चौधरीसहितको गुण्डा दस्ताले चालक र कर्मचारीसँग पैसा मागेका थिए । तर उनीहरुले दिन अस्वीकार गर्दा वडाध्यक्ष चौधरी आफैं कुटपिटमा ओर्लिए । साथै, कर्मचारीको साथमा रहेको अढाई लाख रुपैयाँ लुटेर लगेको कम्पनीले दावी गरेको छ । यसअघि पनि चौधरीले सो उद्योगसँग पटक पटक पैसा माग्ने गरेको एक कर्मचारीले बताएका छन् ।

उद्योगका प्रशासकीय अधिकृत देवीलाल थापाका अनुसार, वडाध्यक्ष चौधरी यस्तै गरी गुण्डादलका साथ आएर धम्क्याएर पैसा लैजानेमा पर्छन् । वडाध्यक्ष चौधरीको यस्तो व्यवहारले उद्योग सञ्चालनमै वाधा परेको पनि अधिकृत थापाले बताए । हिजो राति पनि वडाध्यक्ष चौधरीले स्वयं गुण्डाका साथ आएर पैसा मागेको आरोप लगाउँदै अधिकृत थापाले भने– उद्योगका एकजना ओभरसियरसहित ट्रकका चालक र सहचालकमाथि हातपात गरे ।

वडाध्यक्ष चौधरीको यस्तो व्यवहारबाट आजित भएपछि उनी विरुद्ध उजुरी दिन ईलाका प्रहरी कार्यालय सिमरामा जाँदा उजुरी नै नलिइएको पनि थापाले बताए । उल्टै मिलापत्र गर्न प्रहरीले दबाव दिएको पनि उनले बताए । घटना सार्वजनिक भएपछि वडाध्यक्ष चौधरी आत्तिएका छन् ।

आफ्नो अपराधकर्म ढाकछोप गर्न चौधरीले आज बिहान फेसबुक पेजमा उल्टो आरोप लगाएका छन् । फेसबुक पेजमा उनी लेख्छन्– एडभान्स सिमेन्टका सञ्चालकले चोरबाटो भएर रातको समयमा रोडको क्षमता भन्दा बढी ४० टन भन्दा बढी माल लोड गरी ल्याइएको रहेछ । कोभिड–१९ का बेला लकडाउनको पालना नगरी ल्याइएको गाडीलाई वडाध्यक्ष मोहित चौधरी र सदस्य लक्ष्मण चौधरीसहितको टिमले नियन्त्रणमा लिएका हुन् । साथै, भारतीय नम्बर प्लेटको उक्त कन्टेनर पक्राउ गरी कारबाही गरिएको दावी उनले फेसबुकमार्फत गरेका छन् ।

तर, चौधरीको स्वभाव भने त्यस्तो नरहेको स्थानीयको दावी छ । भ्रष्ट चरित्र भएका चौधरीले आफ्नो कर्तुत सार्वजनिक भएपछि मात्रै फेसबुकमा यस्तो टिप्पणी गरेको स्थानीयको भनाई छ । वडमध्यक्ष चौधरीले सो क्षेत्रका अन्य उद्योगहरुसँग पनि विभिन्न वहानामा घुस रकम असुल्दै आएका छन् ।