संविधान संशोधन गर्न राजपा र समाजवादीको छुट्टै विधेयक दर्ता

१९ जेठ, काठमाडौं । सरकारले माग सम्बोधन गर्न अस्वीकार गरेपछि राष्ट्रिय जनता पार्टी ‘राजपा’ नेपाल र समाजवादी पार्टीले छुट्टै संविधान संशोधन विधेयक दर्ता गरेका छन । सोमबार राजपा नेता लक्ष्मणलाल कर्णसहितको टोलीले संघीय संसद सचिवालयमा गई संशोधन विधेयक दर्ता गराएका नेता केशब झाले बताए ।

यसअघि गत शुक्रबार संसदले उनीहरुको संशोधन विधेयक दर्ता गरेको थिएन । त्यतिबेला संघीय संसदका महासचिव भरतराज गौतमले सभामुखसँग परामर्श गर्ने भनी फर्काएका थिए । सोमबार भने उनले विधेयक दर्ता गर्न मानेका छन ।

नेता कर्णले सत्तारुढ दलले आफूहरुको विधेयकमा समर्थन नगरे आफूहरु पनि सरकारले ल्याएको विधेयकमा समर्थन नगर्ने चेतावनी दिए । ‘सरकारले पनि अर्को विधेयक दर्ता गरेको छ, सरकारले मान्दैन भने हामीले के गर्ने हो त्यो गर्छौं’ उनले भने ‘हाम्रो मानेन भने उनीहरुको मान्न बाध्य हुन्नौं ।’

नेता कर्णले आफूहरुको विधेयकलाई नेपाली कांग्रेसले पनि समर्थन गर्नुपर्ने बताए । मधेसवादी दलले नागरिकता, राष्ट्रियता, कामकाजको भाषा लगायतका विषयमा संविधान संशोधन चाहेका छन ।

तर सरकारले भने नेपालको नयाँ नक्सासहितको सीमाका विषयमा संविधान संशोधन गर्न चाहेको छ । जसले गर्दा सत्तारुढ र विपक्षी दलबीच संविधान संशोधनका विषयमा आ आफ्नै तर्क आइरहेका छन । नेपाली कांग्रेसले सरकारको संशोधन विधेयकमा समर्थन गरिसकेको भएपनि मधेसवादी दलले ल्याएको विधेयक के गर्ने ? भन्नेमा स्पष्ट भइसकेको छैन ।