१४ दलद्वारा भारतीय दूताबास अगाडि धर्ना

२० जेठ, काठमाडौं । भारतले नेपाली भूमि अतिक्रमण गरेपछि चुलिएको विवादलाई साम्य पार्न सरोकारवाला देशले चासो देखाउनुपर्ने माग राख्दै आज १४ राजनीतिक दलले ज्ञापनपत्र बुझाएका छन् ।

नेपाली कांग्रेस (बीपी)को अगुवाईमा आज भारतीय दूताबास अगाडि धर्ना समेत दिइएको छ । साना बाम तथा प्रजातान्त्रिक दलहरु मिलेर विवादित भूमि नेपालको भएकाले आवश्यक सहयोग गर्न चीन तथा भारतीय दूतावासमा ज्ञापनपत्र बुझाइएको नेका वीपीका महामन्त्री सुशीलमान शेरचनले बताएका छन् ।

१४ वटै दलका प्रतिनिधि सहभागी भई ज्ञापनपत्र बुझाउन जाँदा भारतीय दूतावासले लिन नमानेको जानकारी उनले दिए । तर चिनियाँ दूतावासले भने ज्ञापनपत्र लिएको भन्दै महामन्त्री शेरचनले भारतीय दूतावासले राजनीतिक व्यवहार नदेखाएको भन्दै धर्ना दिइएको पनि बताए ।

भारतले गत बैशाख २६ गते नेपाली भूमि लिपुलेक हुँदै तिब्बतको मानसरोबर जोड्ने सडकको उद्घाटन गरेपछि विवाद चुलिएको छ । भारतले गएको असोजमै नेपाली भूमिलाई समेटेर राजनीतिक नक्शा जारी गरेपनि नेपालले भने यही जेठ ७ गते मात्र नयाँ नक्शा जारी गरेको हो ।