कोरोना संकटकाल घोषणा गर्न स्वास्थ्य मन्त्रालयको प्रस्ताव मन्त्रिपरिषदमा

२१ जेठ, काठमाडौं । कोरोना महामारीले नेपालमा पनि विकराल रुप लिन थालेपछि सरकारले स्वास्थ्य संकटकाल घोषणा गर्ने तयारी गरेको छ । स्वास्थ्य तथा जनसङ्ख्या मन्त्रालयले स्वास्थ्य संकटकाल हेल्थ इमर्जेन्सी घोषणाको प्रस्ताव मन्त्रिपरिषदमा लैजाने निर्णय गरेसँगै नेपालमा पहिलो पटक स्वास्थ्य संकटकाल घोषणा गर्न लागिएको हो ।

मन्त्रालयमा बुधबार बसेको बैठकले दुई हजार भन्दा बढी कोरोना संक्रमित देखिएपछि संक्रामक रोग ऐन २०२० अन्तर्गत हेल्थ इमर्जेन्सी घोषणाको प्रस्ताव गर्ने निर्णय गरेको हो । संक्रमक रोग ऐन २०२० को दफा २ मा नेपालभर या देशको कुनै भागको मानिसमा कुनै संक्रामक रोग फैलिने देखिएमा नेपाल सरकारले सो रोग रोकथाम गर्न सर्वसाधारण जनता वा कुनै व्यक्तिहरुको समूह उपर लागु हुने गरी आवश्यक आदेश जारी गर्न सक्ने व्यवस्था छ ।

मन्त्रालयको कोभिड इन्सिडेन्ट कमाण्ड सिस्टमको प्रमुख डा गुणराज लोहनीले स्वास्थ्य संकटकाल मापदण्ड मन्त्रिपरिषदले स्वीकृत गरेपछि जारी गर्ने बताए । बुधबार सोही विषयमा छलफल गर्न प्रधानमन्त्री केपी शर्मा ओलीले मन्त्रालयका तथा स्वतन्त्र विज्ञलाई समेत छलफलमा बोलाएका थिए । विज्ञसँग परामर्श गरेर प्रधानमन्त्रीले यसबारेमा निर्णय लिने तयारी गरेका हुन ।