लकडाउनको मोडालिटी फेर्न सरकार लचिलो

२२ जेठ, काठमाडाैं । आज मन्त्रिपरिषद् बैठक बस्दैछ। लकडाउनको मोडालिटीबारे छलफल गर्न बैठक बस्न लागेकाे हाे । प्रधानमन्त्रीका सल्लाहकार सुर्य थापाका अनुसार प्रधानमन्त्री निवास बालुवाटारमा ४ बजे बस्ने बैठकमा लकडाउन मोडालिटीबारे छलफल हुने भएकाे छ ।

विगत अढाई महिनादेखि निर्बिकल्प बनाइएको लकडाउनबाट आजित भई सरोकारवालाहरुले अबज्ञा गर्न थालेपछि वाध्य भएर सरकारले यसको मोडालिटी परिवर्तन गर्ने तयारी थालेको हाे । हिजैदेखि देशैभरि लकडाउनको अवज्ञा हुन थालिसकेको छ । केवल सत्ता जोगाउने अस्त्रका रुपमा मात्रै केपी ओलीले लकडाउनको दुरुपयोग गरेको भन्दै सर्वत्र असन्तोष र आक्रोश थपिएकोछ ।

हिजै साँझ लकडाउनको मोडालिटी कस्तो बनाउँदा उपयुक्त हुन्छ भन्दै प्रधानमन्त्री केपी शर्मा ओलीले विज्ञहरुसँग लामै छलफल गरेका थिए । छलफलमा अब लकडाउनको निरन्तरताले नयाँ समस्या थपिने भन्दै विज्ञहरुले तत्काल खुकुलो गर्न सल्लाह दिएका थिए ।

आजै मात्र नेपाल राष्ट्रिय व्यावसायी महासंघले पनि पसल व्यावसाय सञ्चालन गर्न सदस्यहरुलाई आह्वान गरेपछि राजधानीको न्यूरोड लगायत धेरै स्थानमा पसल खुलेका छन् । सरकारले पछिल्लो समय थपेको लकडाउनको समय जेठ ३२ गते सकिँदैछ।