एमसीसीको समर्थन गर्ने सांसद र जनप्रतिनिधिलाई विप्लवको चेतावनी

२२ जेठ, काठमाडौं । प्रतिबन्धित नेकपाले बहुचर्चित अमेरिकी एमसीसीको पक्षमा बोल्ने जो कोहीलाईपनि कारवाही गर्ने चेतावनी दिएको छ । पार्टीको सेती–महाकाली ब्यूरोका इञ्चार्ज निर्माणले आज एक विज्ञप्ति मार्फत् यस्तो चेतावनी दिएका हुन् ।

सो पार्टीले केपी ओली नेतृत्वको दलाल सामाजिक फासिवादी सरकारको गुलाम राष्ट्रवाद अहिले एमसीसीमा गएर पोखिएको भन्दै कालापानीमा देखापरेको क्षणिक नक्कली राष्ट्रवाद एमसीसीमा गएर घोप्टिएपछि दलाल केपी ओलीको गुलाम राष्ट्रवाद आम जनतामा उदाङ्गो भएको जनाएको छ ।

‘आम देशभक्त जनताका भावना विपरीत केपी नेतृत्वको दलाल सरकारले राष्ट्रिय सार्वभौमिकताका बिरुद्धको अमेरिकी सैन्य परियोजना, एमसीसी ‘सहस्राब्दी आर्थिक लक्ष’ सरकारको नीति तथा कार्यक्रममा ल्याएर संसदबाट पास गर्न खोज्नु निन्दनीय र खेदजनक कार्य हो । यो नाङ्गो राष्ट्रघात हो र जनमतको उपहास हो ।

यसका बिरुद्ध हाम्रो पार्टी केन्द्रले यहीँ २०७७ जेठ १९ गतेदेखि चरणबद्ध संघर्षका कार्यक्रम घोषणा गरेको छ । यसलाई थप बल पुग्ने गरि सेती महाकाली ब्युरोका तर्फबाट निम्न कार्यक्रमहरु सार्वजनिक गरिएको छ ।’ विज्ञप्तिमा भनिएको छ ।