लकडाउन खुकुलो पार्ने सरकारको तयारी, दुई दिनपछि निर्णय हुने

२२ जेठ, काठमाडौं । सरकारले लकडाउन खुकुलो पार्ने भएको छ । बिहीबारदेखि काठमाडौंसहित देशका विभिन्न ठाँउमा व्यापारीले बजार पसल खोलेपछि सरकारले लकडाउन खुकुलो पार्ने तयारी गरेको हो । यसका लागि विशेष मोडालिटी दुई दिनभित्र पेश गर्न सरकारले उच्चस्तरीय समितिलाई निर्देशन दिएको छ ।

बिहीबार प्रधानमन्त्री निवास बालुवाटारमा बसेको मन्त्रिपरिषद बैठकले लकडाउन खुल्ने मोडालिटीसहितको कार्ययोजना पेश भनेको हो । केही दिनयता व्यवसायीहरुले व्यवसाय सञ्चालन गर्न दिन माग गर्दै नदिए अवज्ञा गर्ने चेतावनी दिएपछि यस विषयमा मन्त्रिपरिषद बैठकमा छलफल भएको हो ।

सरकारले चैत ११ गतेदेखि लकडाउन जारी राखेको छ । तर रोगले भन्दा भोकले मर्ने अवस्था सिर्जना भएको भन्दै सरकारले लकडाउन खुकुलो पार्ने तयारी गरेको हो ।

सरकारले चैत ११ गते एक साताका लागि सुरु गरेको लकडाउनको आज ७३ दिन पुगेको छ । नेपालमा आज बिहीबार मात्र एकैदिन ३३४ जनामा कोरोना भाइरसको पुष्टि भएसंगै संक्रमितको कूल संख्या २६३४ पुगेको छ ।

स्वास्थ्य मन्त्रालयका अनुसार कोरोना संक्रमणबाट मृत्यु हुनेको संख्या १० पुगेको छ भने कोरोना जितेर घर फर्किनेको संख्या २९० पुगेको छ ।