कोरोना संक्रमित २३ पुगसँगै सीडीओ र एसपी अनुगमनमा

२४ जेठ, स्याङ्जा । स्याङ्जामा भारतबाट आउनेको संख्या बढ्न थालेपछि र कोरोना संक्रमण देखिन थालेपछि जिल्ला सुरक्षा समितिले हरेका पालिकामा अनुगमन शुरु गरेको छ । क्वारेन्टाइनमा बस्ने मानिसको अवस्था र पालिकाले गरेको व्यवस्थालाई प्रभावकारी बनाउन सुरक्षा समिति स्याङ्जाका अध्यक्ष समेत रहेका प्रमुख जिल्ला अधिकारी गंगाबहादुर क्षेत्रीको नेतृत्वमा अनुगमन शुरु गरिएको हो ।

भारतबाट आउने गण्डकी प्रदेशका मानिसको प्रमुख नाका स्याङ्जा हो । प्रदेशका हरेक जिल्लामा भारतबाट आउने मानिसहरु स्याङ्जा हुदै जानुपर्ने भएकाले पनि जिल्लालाई कोरोना संक्रमणको उच्च जोखिम हुन सक्ने जिल्ला सुरक्षा समितिले आंकलन गरेको छ । जिल्लामा भारतबाट आउने मानिसको चापसगै कोरोना संक्रमण बढ्न थालेपछि जिल्ला सुरक्षा समितिले आइसुलेसन र क्वारेन्टाइनको अवस्थाबारे अनुगमन शुरु गरेको हो । हरेक पालिकाले निर्माण गरेको क्वारेन्टाइनको अवस्था र त्यहाँ बस्ने मानिसहरुको व्यवस्थाका बारेमा गुनासो आउन थालेपछि जिल्ला सुरक्षा समितिले अनुगमन शुरु गरेको हो । स्याङ्जामा भारतबाट आएका मानिसहरुमा कोरोना संक्रमण देखिन थालेपछि अन्य समुदायमा पनि यो भाईरस नसरोस भन्ने उदेश्यले सुरक्षा समितिले अनुगमनलाई तिब्रता दिएको स्याङ्जाका प्रमुख जिल्ला अधिकारी क्षेत्रीले बताए ।

क्वारेन्टाइन निर्माण भएपनि स्याङ्जामा संक्रमित देखिएका व्याक्तिलाई उपचारका लागि भने व्यवस्थित आइसुलेसनको व्यवस्था गरिएको थिएन । कोरोना संक्रमणको संख्या बढेपछि आइसुलेसन निर्माणमा पहिला लाग्नु परेको प्रजिअ क्षेत्रीको भनाई थियो । जिल्लामा संक्रमणको संख्या बढेसगै सुरक्षा समिति अत्यन्तै गम्भिर बनेको छ, प्रजिअ क्षेत्रीले भने,“ यो सबैको साझा समस्या हो भन्ने बुझेर सबै आ—आफ्नो ठाउँबाट लाग्नुपर्ने अवस्था रहेको छ ।” यो माहामारीबाट बच्न सबैले लकडाउनलाई पालना गर्न आग्रह गर्छु उनले भने ।

हरेक क्वारेन्टाइनमा बसेका मानिसको सुरक्षाको जिम्मेवारी नेपाल प्रहरीले पाएको छ । सुरक्षाका दृष्टिकोणले जति सक्यो थोरै क्वारन्टाइनको व्यवस्था र प्रहरी जनशक्तिको परिचालनमा प्रहरीलाई चुनौतीको बिषय बनेको छ । कोरोना संक्रमणको मात्रै नभएर अन्य अपराधिक क्रियाकलापको पनि चुनौतिलाई सामाना गर्दै समाज र समुदायको यो माहामारीबाट र अन्य अपराधिक क्रियाकलापको सुरक्षाका निम्ति जिल्ला प्रहरी कार्यालयले नयाँ रणनीति अनुसार कामको थालनी गरेको जिल्ला प्रहरी प्रमुख प्रहरी उपरीक्षक बिमलराज कणेलले बताए । जनशक्तिको अभाव हुन नदिने गरी सुरक्षा व्यवस्थालाई मजबुद बनाउने प्रयास जारी रहेको प्रहरी प्रमुख कणेलले बताए ।

स्याङ्जामा अहिलेसम्म भारतबाट आएर क्वारेन्टाइनमा बस्नेको संख्या करिब १ हजारको हाराहारीमा रहेको छ । संघिय र प्रदेश सरकारले खासै आर्थिक सहयोग नगरेपनि क्वारेन्टाइनमा बस्ने मानिसको सबै जिम्मेवारी जिल्लाका सबै पालिकाले लिदै आएका छन् । कोरोना संक्रमणको संख्या २३ पुगेसगै उनीहरुको उपचारका लागि निर्माण गरिएको आइसुलेसनमा पनि पालिकाले नै खर्च व्यहोर्दै आएको अवस्था छ । उनीहरुलाई खान बस्नदेखि उनीहरुको पीसीआर टेष्टको खर्च पालिकाले नै व्यहोर्दै आएको वालिङ नगर प्रमुख दिलिपप्रताप खाँणले बताए ।

अहिलेसम्म स्याङ्जामा भीरकोट, पुतलीबजार नगरपालिका र अर्जुनचौपारी, आँधीखोला र फेदिखोला गाँउपालिका बाहेक सबै पालिकामा कोरोना संक्रमण देखिएको छ । भारत लगायत तेस्रो मुलुकबाट स्याङ्जाबासी आउने क्रम बढ्दोसँगै व्यवस्थित क्वारेन्टाइन र सुविधायुक्त आईसुलेसनमा जिल्लाको सुरक्षा समिति र जिल्लाका जनप्रतिनिधिहरु चनाखो हुनु आवश्यक छ । जिल्लालाई कोरोना संक्रमणमुक्त बनाउने अभियानमा स्याङ्जावासीले पनि सम्वन्धित निकायलाई सघाउन आवश्यक देखिन्छ ।