आरडीटीको भरमा संक्रमित क्वारेन्टाइनबाट घर पठाउन सुरु गरेपछि स्थानीय त्रसित

◊ धीरुभाइ

२४, जेठ सप्तरी । अविश्वास जागृत भइसकेको अवस्थामा आरडीटी परीक्षण गरेर क्वारेन्टाइनबाट सिधै घर पठाउन सुरु गरिएपछि सर्वसाधारणमा थप संक्रमणको त्रास भएको छ । भारतको संक्रमित सहित विभिन्न स्थानबाट आएका नेपाली नागरिकहरु सप्तरीको विभिन्न क्वारेन्टाइनमा बसेकाहरुलाई आरडीटी परीक्षणको भरमा घर पठाइएपछि स्थानीयवासी त्रसित बनेको हो ।

आफु बसेको क्वारेन्टाइनमा एक दर्जन बढी जना संक्रमित भएर आइसोलेशनमा भर्ना भएको भन्दै चन्दनकुमार चौधरीले भने क्वारेन्टाइनमा बसेको सबैको पीसीआर परीक्षण नगरी आरडीटी गरेर घर पठाउने गरेको छ । आरडीटी परीक्षण भपर्दो छैन यसले समुदायमा संक्रमण फैलिन सकिने उनको धारणा छ ।

जिल्लाको विभिन्न क्वारेन्टाइनमा १४ दिन अवधि पूरा गरेकाहरुलाई आरडीटी परीक्षण गरी घर पठाइने गरेको छ । सरकारले कोरोना सम्बन्धी नयाँ निर्देशन जारी गरेपछि क्वारेन्टाइनमा समयावधि पूरा गरेपछि आरडीटी गर्दा नेगेटिभ रिपोर्ट आएपछि घर पठाउन सुरु गरिएको हो ।

यसै क्रममा भारतबाट आई जिल्लाको बोदेबर्साईन नगरपालिका अन्तर्गतका क्वारेन्टाइनबाट १२३ जनालाई थप १४ दिन घरको क्वारेन्टाइनमा बस्ने गरी घर पठाइएको नगरपालिकाका स्वास्थ्य संयोजक बैजनाथ साहले बताए । आरडीटी रिपोर्टमा १९ जनामा पोजेटिभ पाइएको उनले बताए ।

नगरपालिकाको वडा नम्बर ५ स्थित चन्द्रा नमुना माध्यमिक विद्यालयको क्वारेन्टाइन ९१ जनाको आरडीटी परीक्षण गर्दा दुई महिला र १३ पुरूष गरी १५ जनामा आरडीटी पोजेटिभ पाइएको संयोजक साहले जानकारी दिउ । त्यस्तै बोदे बर्साईन नगरपालिका वडा नम्बर ८ काचन स्थित जनता मावि क्वारेन्टाइनमा ५१ जनाको आरडीटी गर्दा चार पुरूषमा आरडीटी पोजेटिभ पाइएको बताए ।

आरडीटी गर्दा पोजेटिभ रिपोर्ट आएक व्यक्तिहरुको पीसीआर परीक्षणका लागि स्वाब संकलन गर्ने तयारी भईरहेको उनले बताए । यता उक्त क्वारेन्टाइनमा ठूलो संख्यामा संक्रमित फेला परेपछि स्थानीय त्रसित रहेको अवस्थामा आरडीटी परीक्षण विश्वाशिलो नभएको भन्दै क्वारेन्टाइनमा बसेका सबैको पीसीआर परीक्षण गरी रिपोर्टको आधारमा मात्र घर पठाउने व्यवस्था मिलाउन स्थानीयको माग छ । बोदेबर्साइन नगरपालिकाको ती दुबै क्वारेन्टाइनबाट २१ जना संक्रमित पुष्टि भएर आइसोलेशनमा उपचारत छन ।

जिल्लाको विभिन्न क्वारेन्टाइनका गरी हालसम्म एक हजार ६२२ जनाको आरडीटी गरिएको छ । परिक्षण गरिएकोमध्ये एक हजार ५७४ जनाको नेगेटिभ रिपोर्ट आएको छ भने २७ जनाको पोजेटिभ रिपोर्ट आएको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए । आरडीटी पोजेटिभ मध्येका चार जनाको पीसीआर रिपोर्ट नेगेटिभ आएको छ भने २३ जनाको स्वाब संकलन गरी पीसीआर परीक्षणको लागि पठाइएको उनले जानकारी दिए ।

क्वारेन्टाइनको स्वास्थ्यकर्मी पनि संक्रमित

बोदेबर्साइन नगरपालिकाको क्वारेन्टाइनमा खटिएको एक स्वास्थ्यकर्मी, एक कार्यालय सहयोगी, एक प्रहरीसहित २१ जनामा कोरोना भाइरस संक्रमण पुष्टि भइसकेको छ । संक्रमित स्वास्थ्यकर्मीलाई बोदेबसाईनको स्थास्थ्य चौकीको आइसोलेशन र अन्यको राजविराज स्थित अस्पतालको आइसोलेशनमा राखेर उपचार भइरहेको बताइएको छ ।  जिल्लाभरीका आज सात जना संक्रमित थपिएको छ । यससँगै जिल्लामा कूल संक्रमितको संख्या ७७ पुगेको छ ।